काठमाडौं । नेकपा (एमाले)ले आउँदो ११औँ महाधिवेशनका लागि प्रतिनिधि छनोटमा सात वटा आधार लागू गर्ने भएको छ। यसका लागि पार्टीले अन्तरपार्टी निर्देशन (अपानी) जारी गरी मातहतका सबै कमिटीहरूलाई पठाएको छ।

मंसिर २७ देखि २९ गतेसम्म काठमाडौंमा हुने महाधिवेशनका लागि प्रतिनिधि छनोट मंसिर १३ गते देशभर एकै पटक हुनेछ। यसअघि नै सचिवालय बैठकले उक्त कार्यतालिका सार्वजनिक गरिसकेको थियो।

अपानीका अनुसार प्रतिनिधि छनोटका प्रमुख आधारहरू यसप्रकार छन्

1. केन्द्रीय संगठन विभागले प्रमाणित गरेको सदस्यता विवरणका आधारमा मात्र प्रतिनिधि छनोट हुनेछ।
2. सदस्यता स्थानान्तरण चाहनेले कात्तिक मसान्तभित्र नयाँ भूगोलमा दर्ता गरिसक्नुपर्नेछ।
3. पदेन प्रतिनिधि रहेका आयोजकहरू छनोट प्रक्रियामा सहभागी हुन पाउने छैनन्।
4. दलित र श्रमिक क्लस्टरका सदस्यहरूको विवरण जिल्ला र प्रदेश कमिटीले एक हप्ता अगाडि सार्वजनिक गर्नुपर्नेछ।
5. जनसंगठनमा आवद्ध रहन चाहनेले भूगोल वा विशेष कमिटीबाट नाम अलग गर्नुपर्ने व्यवस्था गरिएको छ।
6. विवाद वा अस्पष्टता भएमा प्रत्यक्ष केन्द्रीय संगठन विभागसँग सम्पर्क गर्न भनिएको छ।
7. अधिक प्रतिनिधि पठाएमा मान्यता नदिने स्पष्ट प्रावधान राखिएको छ।

पार्टी अध्यक्ष केपी शर्मा ओलीले जारी गर्नुभएको अपानी अहिले मातहतका कमिटीहरूमा पुगीरहेको प्रचार तथा प्रकाशन विभाग प्रमुख राजेन्द्र गौतमले जानकारी दिए। उनका अनुसार अपानी प्राप्त भएपछि जिल्ला कमिटीहरूले संघीय निर्वाचन क्षेत्रअनुसार प्रतिनिधि छनोट प्रक्रिया अघि बढाउने छन्।

महाधिवेशनमा केन्द्रीय सदस्य, विभिन्न निकाय, भूगोल, क्लस्टर र मनोनीत गरी २,१२७ जना प्रतिनिधि सहभागी हुनेछन्। छनोट भएका प्रतिनिधिले फोटोसहितको विवरण संगठन विभागले तोकेको ढाँचामा भरी केन्द्रीय कार्यालयमा पठाउनुपर्नेछ।