भैरहवा । रूपन्देहीको भैरहवास्थित होटल निर्वाणामा सोमबार राति गोली प्रहार भएको छ। घटनामा होटलका सुरक्षा गार्ड मीनबहादुर परियार (२७) घाइते भएका छन्। जिल्ला प्रहरी कार्यालय रूपन्देहीका प्रमुख प्रहरी उपरीक्षक प्रदीप क्षेत्रीका अनुसार घटना राति १ बजे तिर भएको हो। गार्ड परियारको तिघ्रामा गोली लागेको र उनलाई राति नै भीम अस्पताल भैरहवामा उपचारका लागि लगिएको थियो। अहिले उनी स्वास्थ्य लाभपछि घर फर्किसकेका छन्।

घाइते परियारका अनुसार होटल अगाडि केही व्यक्तिहरूबीच विवाद चलिरहेको बेला एउटा समूह होटल प्रवेश गर्न खोज्दा आफूले रोक्न खोजेपछि एक व्यक्तिले पेस्तोल निकालेर गोली प्रहार गरेका थिए। प्रहरीका प्रारम्भिक अनुमान अनुसार गोली चलाउने व्यक्ति क्यासिनो खेल्न आउने भारतीय नागरिक हुन सक्ने सम्भावना रहेको छ।

एसपी क्षेत्रीका अनुसार नेपाल–भारत सीमा बेलहिया क्षेत्रमा चेकजाँच कडाइ गरिएको छ र भारतीय प्रहरीसँग समन्वय गरी अपराधीको खोजी तीव्र पारिएको छ। तर, राति भरको प्रयासपछि पनि गोली प्रहार गर्ने व्यक्ति फेला परेको छैन। स्थानीयवासीका अनुसार घटनापछि होटल परिसर र वरिपरि सुरक्षा व्यवस्था कडाइ गरिएको छ।