काठमाडौं । निवर्तमान प्रधानमन्त्री केपी शर्मा ओली र गृहमन्त्री रमेश लेखकलाई सरकारको अनुमति विना काठमाडौं उपत्यका बाहिर जान नपाउनेगरी तोकिएको स्थानहद (movement restriction)विरुद्ध परेको रिटमा सर्वोच्च अदालतले अन्तरिम आदेश दिन अस्वीकार गरेको छ।

न्यायधिश नृपध्वज निरौलाको इजलासले सरकारले र जाँचबुझ आयोगले पेश गरेका कारणको आधारमा आदेश जारी गरेको छ। अधिवक्ता डा. प्रेमराज सिलवालले स्थानहद तोक्नु कानून विपरीत भएको दाबी गर्दै सर्वोच्चमा रिट दर्ता गरेका थिए। जेन–जी आन्दोलनको क्रममा भएको दमन र भोलीपल्टको आगजनीबारे जाँचबुझ गर्न गठन भएको आयोगको सिफारिसमा सरकारले ओली, लेखक र तत्कालिन प्रमुख जिल्ला अधिकारी छविराज रिजाललाई अनुमतीविना उपत्यका बाहिर जान नदिने निर्णय गरेको थियो।

यस्तै तत्कालिन गृहसचिव गोकर्णमणि दुवाडीमाथि पनि स्थानहद लगाइयो भने पनि सरकारी कामकाजका लागि उनी बाहिर जानुपर्ने भएकाले स्थानहद फुकुवा गरिएको थियो।