काठमाडौं । प्रेस चौतारी नेपालका केन्द्रीय अध्यक्ष गणेश पाण्डेको लमजुङस्थित घरमा गएराति अज्ञात व्यक्तिहरूले ढुंगा प्रहार गरेका छन्।

शुक्रबार प्रेस चौतारी नेपालले जारी गरेको विज्ञप्तिअनुसार लमजुङको सदरमुकाम बेँशीसहरस्थित पाण्डेको घरमा मध्यरात करिब १२ बजे ढुंगा प्रहार हुँदा झ्यालका सिसा फुटेका छन्।

अध्यक्ष पाण्डेले बताएका अनुसार, ८२ वर्षीया हजुरआमा सुतेको कोठामा बढी क्षति पुगेको छ। सो घरमा उनकी आमा र हजुरआमा बस्दै आएका छन्।

विज्ञप्तिमा भनिएको छ, “पत्रकारिता र अभिव्यक्ति स्वतन्त्रताका पक्षधर, श्रमजीवी तथा व्यावसायिक पत्रकारहरूको साझा संस्था प्रेस चौतारी नेपालका केन्द्रीय अध्यक्षकै घरमा भएको यस्तो आक्रमण अत्यन्त गम्भीर र निन्दनीय छ।”

प्रेस चौतारी नेपालले भदौ २४ गतेदेखि सामाजिक सञ्जालमा अध्यक्ष पाण्डेविरुद्ध भइरहेका उत्तेजनात्मक पोस्ट र घरमा आक्रमण गर्न गरिएको आह्वानपछि यो घटना योजनाबद्धरूपमा भएको ठहर गरेको छ।

महासचिव हिरामान लामाद्वारा जारी विज्ञप्तिमा भनिएको छ, “अध्यक्षलाई डर देखाएर चौतारीका कलमजीवीहरूलाई दबाउने प्रयास सफल हुन सक्दैन। अपराधमा संलग्न व्यक्तिहरूलाई तत्काल पक्राउ गरी कानूनी कारबाही गर्न माग गर्दछौं।”

प्रेस चौतारी नेपालले घटनाको निष्पक्ष र छिटो अनुसन्धान गरी दोषीहरूलाई कानूनी कठघरामा उभ्याउन प्रशासन र सुरक्षा निकायसँग आग्रह गरेको छ।