काठमाडौं । बञ्चरेडाँडामा फोहोर विसर्जनमा रोक लगाइएपछि समस्या समाधानका लागि सहरी विकास मन्त्रालयले सरोकारवालासँग शुक्रबार छलफल गर्ने भएको छ।

१८ बुँदे सहमति कार्यान्वयन नभएको भन्दै स्थानीयले फोहोर विसर्जन रोक्दा काठमाडौं उपत्यकाको फोहोर व्यवस्थापन प्रभावित बनेको हो। मन्त्रालयले धुनीवेशी नगरपालिका र ककनी गाउँपालिकाका प्रमुख, वडाअध्यक्ष र सरोकारवालालाई छलफलमा बोलाएको छ। सिनियर डिभिजनल इन्जिनियर महेशबहादुर सिंहद्वारा पठाइएको पत्रमा सबै प्रतिनिधिलाई उपस्थित रहन अनुरोध गरिएको छ।

स्थानीय अगुवा नीराजन सञ्जेलले मन्त्रालयले बोलाएको छलफलमा सहभागी हुन तयारी भइरहेको बताए। २०७९ जेठ २६ मा भएको १८ बुँदे सहमति कार्यान्वयन नभएको भन्दै बुधबारदेखि स्थानीयले आन्दोलन गर्दै फोहोर बोक्ने गाडीहरू फर्काएका थिए। उनीहरूले दुर्गन्ध, सरुवाजन्य रोग र सहमति उल्लङ्घनविरुद्ध आन्दोलन गर्दै मुद्दा फिर्ताको माग पनि राखेका छन्।