काठमाडौं । प्रधानमन्त्री सुशीला कार्कीको आह्वानमा आज अपराह्न ४ बजे बालुवाटारमा हुने त्रिपक्षीय बैठकमा सरकार, राजनीतिक दल र जेनजी समूहका प्रतिनिधिहरू सहभागी हुने भएका छन्।

सरकारको तर्फबाट प्रधानमन्त्री कार्कीसहित गृहमन्त्री ओमप्रकाश अर्याल, सञ्चार तथा सूचना प्रविधि मन्त्री जगदीश खरेल, प्रधानमन्त्रीका मुख्य सल्लाहकार अजयभद्र खनाल र प्रेस संयोजक रामबहादुर रावल बैठकमा उपस्थित हुनेछन्।

राजनीतिक दलबाट नेपाली कांग्रेसका गगन थापा र प्रवक्ता डा. प्रकाशशरण महत, नेकपा (एमाले)का केन्द्रीय सदस्य महेश बर्तौला, नेकपा (माओवादी केन्द्र)का वर्षमान पुन र माधव सापकोटा, राष्ट्रिय स्वतन्त्र पार्टीका उपसभापति स्वर्णिम वाग्ले र केन्द्रीय सदस्य निशा डाँगी, राष्ट्रिय प्रजातन्त्र पार्टीका महामन्त्री राजेन्द्र गुरुङ र प्रवक्ता मोहन श्रेष्ठ सहभागी हुने जनाइएको छ।

जेनजी समूहबाट ‘इण्डिजिनिस जेनजी कलेक्टिभ’, ‘हाउ टु देश विकास’ र ‘जेनजी मुभमेन्ट एलाइन्स’का १४ जना प्रतिनिधि बैठकमा सहभागिता जनाउनेछन्।

प्रधानमन्त्रीको सचिवालयका अनुसार बैठकको मुख्य कार्यसूची आगामी फागुन २१ गतेका लागि निर्धारित प्रतिनिधिसभा निर्वाचनको वातावरण निर्माण र राजनीतिक समझदारी जुटाउने विषय रहेको छ। यसअघि पनि सरकार र राजनीतिक दलबीच कात्तिक ४ गते छलफल भइसकेको छ भने राष्ट्रपति रामचन्द्र पौडेलको उपस्थितिमा प्रधानमन्त्री र जेनजी समूहबीच पनि वार्ता भएको थियो।