काठमाडौं । जल तथा मौसम विज्ञान विभाग, मौसम पूर्वानुमान महाशाखाका अनुसार हाल देशभर पश्चिमी वायु र अरब सागरमा विकसित न्यून चापीय प्रणालीको प्रभाव सक्रिय रहेको छ।

यस प्रभावका कारण अहिले गण्डकी प्रदेशका केही स्थानहरू, कोशी, बागमती, लुम्बिनी र कर्णाली प्रदेशका पहाडी तथा हिमाली भूभागका थोरै स्थानमा मध्यम वर्षासहित हिमपात भइरहेको छ। महाशाखाका अनुसार आज दिउँसो कोशी, बागमती, गण्डकी र लुम्बिनी प्रदेशसहितका अन्य पहाडी क्षेत्रहरूमा सामान्य बदली रहनेछ भने तराई भूभागमा आंशिक बदली रहनेछ।
कोशी, बागमती र गण्डकी प्रदेशका पहाडी तथा हिमाली भूभागका एकदुई स्थानमा हल्का वर्षासहित हिमपातको सम्भावना छ।

आज राति देशभर आंशिक बदली रहने अनुमान गरिएको छ। महाशाखाले विशेषगरी बागमती, कमला, कोशी र कन्काई नदी तथा तिनका सहायक नदीहरूमा पानीको बहाव उल्लेख्य रूपमा बढ्ने चेतावनी दिएको छ। कोशी, बागमती र मधेश प्रदेशका महाभारत र चुरे क्षेत्रमा बग्ने साना नदीनालामा आकस्मिक बहाव हुन सक्ने भएकाले सतर्कता अपनाउन विभागले आग्रह गरेको छ।

वर्षा र हिमपातका कारण पहिरो, सडक तथा हवाई यातायात अवरोध, कृषि र पर्यटन गतिविधिमा असर पर्न सक्ने सम्भावना रहेको विभागको पूर्वानुमान छ।