काठमाडौं । सोलुखुम्बुको लोबुचेमा आज बिहान हेलिकप्टर दुर्घटना भएको छ। लुक्लाबाट लुबुचे गइरहेको अल्टिच्युट एयरको हेलिकप्टर अवतरणका क्रममा दुर्घटनामा परेको हो।

त्रिभुवन अन्तर्राष्ट्रिय विमानस्थलका प्रवक्ता रिञ्जी शेर्पाका अनुसार बिहानको समयमा लुक्लाबाट उडेको उक्त हेलिकप्टर लोबुचेमा अवतरणको तयारी गर्ने क्रममा चिप्लिएर दुर्घटनामा परेको हो। हेलिकप्टरमा पाइलट मात्र सवार रहेको र उनी सकुशल उद्दार गरिएको जानकारी शेर्पाले दिएका छन्। दुर्घटनाबाट ठूलो क्षति नभए पनि हेलिकप्टरमा सामान्य क्षति पुगेको बताइएको छ।

लोबुचे र लुक्ला क्षेत्रमा हाल मौसमी हावा र दृश्यता घट्ने अवस्था रहेकाले उडान चुनौतीपूर्ण बनेको अधिकारीहरूले बताएका छन्। उक्त घटनाबारे थप अनुसन्धान भइरहेको Civil Aviation Authority (CAAN) ले जनाएको छ।