काठमाडौं । प्रतिनिधिसभा निर्वाचनको वातावरण तयार गर्न सघन राजनीतिक संवादको तयारीमा रहेको सरकारले पहिलो पटक राजनीतिक दल र जेनजी पुस्ताबीच औपचारिक वार्ता गर्न लागेको छ।

आज (बुधबार) अपरान्ह ४ बजे प्रधानमन्त्री निवास बालुवाटारमा हुने त्रिपक्षीय बैठकका लागि सरकारले राजनीतिक दलहरू र जेनजी समूहका प्रतिनिधिलाई आमन्त्रण गरेको छ।

सञ्चार तथा सूचना प्रविधिमन्त्री जगदीश खरेलका अनुसार निर्वाचनको सफलताका लागि पहिलो पटक सरकार, दल र जेनजी पुस्ताबीच संयुक्त छलफल आयोजना गरिएको हो।

उनले भने, “चुनावलाई निष्पक्ष र स्वच्छ बनाउन सरकार सबै पक्षसँग चरणबद्ध संवाद गर्दैछ। यसअघि ४ कात्तिकमा राजनीतिक दलहरूसँगको पहिलो चरणको छलफल सम्पन्न भएको थियो।”

आजको बैठकलाई आगामी निर्वाचन प्रक्रिया, आन्दोलनपछि उत्पन्न परिस्थितिको समाधान र राजनीतिक सहमतिको प्रारम्भिक चरणका रूपमा हेरिएको छ।