काठमाडौं । नेकपा (एमाले) का पोलिटब्यूरो सदस्य सूर्यबहादुर थापाले देशभर बढ्दै गएको अपराध, हिंसा र हतियार नियन्त्रणमा सरकार पूर्ण असफल भएको जनाएका छन्। उनले यस्तो असक्षम र निष्क्रिय सरकारले चुनावको हल्ला मच्चाउनु जनभावनाको अपमान भएको बताए।

अर्घाखाँचीको सन्धिखर्कमा आयोजित एमालेको विशाल जनप्रदर्शनपछिको सभामा बोल्दै थापाले भने, “हतियार नियन्त्रण गर्न नसक्ने, अपराधी समाउन नसक्ने सरकारले चुनावको हल्ला किन छरिरहेको छ ? जनताको सुरक्षा सुनिश्चित नगरी चुनावको तयारी गर्नु नै जनतालाई ठट्टा बनाउने प्रयास हो।” थापाका अनुसार देशभर हत्या, लुटपाट, अपहरण र गोली प्रहारका घटनाहरू तीव्र रूपमा बढ्दै गएका छन्, तर सरकार कानुनी नियन्त्रण र अनुसन्धानमा बेपरवाह बनेको छ। उनले सरकारको सुरक्षा संयन्त्र नै निष्क्रिय बनाइएको आरोप लगाउँदै भने, “सुरक्षा निकायलाई राजनीतिक स्वार्थका लागि दुरुपयोग गर्नेहरूले जनताको सुरक्षाको ग्यारेन्टी दिन सक्दैनन्।”

कार्यक्रममा उपस्थित हजारौं कार्यकर्ताहरूले थापाको अभिव्यक्तिलाई समर्थन जनाएका थिए। थापाले एमाले नै देशलाई स्थिरता, सुशासन र सुरक्षाको बाटोमा अघि बढाउने एकमात्र वैकल्पिक शक्ति भएको दाबी गरे। उनले भने, “एमाले जनताको पार्टी हो,हामी जनतालाई सुरक्षा, स्थायित्व र समृद्धिको ग्यारेन्टी दिन सक्षम छौं।”