काठमाडौं । नेकपा (एमाले) केन्द्रीय कमिटीको जारी बैठकका विषयमा पार्टीका प्रचार तथा प्रकाशन विभागका प्रमुख राजेन्द्र गौतमले मिडिया ब्रिफिङ गर्नुभएको छ।

गौतमले बैठकमा भएका मुख्य राजनीतिक र संगठनात्मक छलफलबारे सञ्चारकर्मीसँग जानकारी साझा गर्नुभयो। उहाँका अनुसार बैठकले अध्यक्ष केपी शर्मा ओलीले प्रस्तुत गर्नुभएको राजनीतिक प्रतिवेदन, महाधिवेशन मिति तथा स्थानसम्बन्धी प्रस्ताव, र पार्टीभित्रको एकता सुदृढीकरणका विषयमा विस्तृत छलफल गरिरहेको छ ।

ब्रिफिङका क्रममा गौतमले पार्टी नेतृत्वको एकतालाई बलियो बनाउने र संगठनलाई आगामी निर्वाचनका लागि तयार पार्ने उद्देश्यका साथ बैठक सञ्चालन भइरहेको बताउनुभयो । उनले थपे, “एमाले अहिले जनताको पक्षमा ठोस नीति र स्थायित्वको एजेन्डा लिएर अघि बढिरहेको छ। पार्टी नेतृत्वले देशलाई अस्थिरताको अवस्थाबाट निकाल्ने दिशामा गम्भीर तयारी गरिरहेको छ।” गौतमका अनुसार बैठकले आगामी महाधिवेशनको मिति, स्थान र कार्यसूचीबारे चाँडै आधिकारिक निर्णय गर्नेछ।