काठमाडौं । नेपाल पञ्चाङ्ग निर्णायक विकास समितिले यस वर्षको भाइटीकाको उत्तम साइत कात्तिक ६ गते बिहीबार बिहान ११:३९ बजे रहेको जानकारी दिएको छ। यस दिन नेपाल संवत् अनुसार नयाँ वर्ष पनि सुरु हुनेछ।

समितिका अनुसार, साइत खोज्नेहरूले धनु लग्न, कन्या नवमांश, चर बेला, अभिजित् योग र विजय मुहूर्तमा टीका लगाउन सक्नेछन्। सर्वसाधारणका लागि मध्याह्नकालमा टीका लगाउन कुनै बाधा छैन।

यस वर्ष यमपञ्चक कात्तिक १ गतेदेखि सुरु हुनेछ। धनतेरस, काग तिहार, लक्ष्मीपूजा, गाई-गोरु पूजा लगायतका पर्व क्रमशः कात्तिक १-५ गते पर्नेछन्। कात्तिक ६ गते शास्त्रीय विधिअनुसार भाइटीका र नेवारी समुदायको किजापूजा मनाइनेछ।

यमदीपदान, काग–कुकुर पूजा, स्नान-दान आदि परम्परागत क्रियाकलाप यमपञ्चकका क्रममा गरिने पञ्चाङ्गले उल्लेख गरेको छ।