काठमाडौं । नेपाली कांग्रेसको आजदेखि सुरु हुने केन्द्रीय समिति बैठकका एजेन्डा तय गर्न शीर्ष नेताबीच सहमति जुट्न सकेको छैन।

मंगलबार बिहान सभापति शेरबहादुर देउवा र महामन्त्रीद्वय गगन थापा तथा विश्वप्रकाश शर्माबीच भएको छलफलमा बैठकमा पेस गरिने एजेन्डाबारे एकमत हुन नसकेको कांग्रेस स्रोतले जनाएको छ।

दुवै महामन्त्रीहरू मंसिरमा नियमित महाधिवेशन गर्ने कार्यतालिका ल्याउने अडानमा छन् भने सभापति देउवा पक्ष भने त्यसबारे लचिलो छैन।

तीन नेताबीच छलफलपछि आज बिहान ११ बजे बस्ने भनिएको कार्यसम्पादन समिति बैठक पनि सुरु हुन सकेको छैन।
देउवा निकट नेताका अनुसार, सभापति देउवाले केन्द्रीय समिति बैठकमा आफ्नो वक्तव्य प्रस्तुत गर्ने तयारी गरेका छन्।

तर, बैठकमा प्रस्तुत गरिने एजेन्डामा सहमति नजुटेकाले आजको बैठक स्थगित गरेर साझा एजेन्डा तय गर्न नेताहरू अनौपचारिक छलफलमा जुटिरहेका छन्।