काठमाडौं । धनकुटामा सोमबार बिहान एक मिनि ट्रक दुर्घटनाग्रस्त हुँदा दुई जना गम्भीर घाइते भएका छन्। धनकुटा नगरपालिका-९, पाँचगोलाइ भन्ने स्थानमा बिहान करिब २ बजे प्रदेश ३-०१-००३क-६९०६ नम्बरको मिनि ट्रक धनकुटाबाट मुलघाटतर्फ आउँदै गर्दा ब्रेक फेल भई करिब ३०० मिटर तल खसेको प्रहरीले जनाएको छ।

सशस्त्र प्रहरीका सह-प्रवक्ता डिएसपी शैलेन्द्र थापाका अनुसार दुर्घटनामा चालक नारायण खड्का (२६ वर्ष), उदयपुरगढी गाउँपालिका–५, र सहचालक दिनेश कार्की (२० वर्ष), रानीटार, उदयपुर गम्भीर रूपमा घाइते भएका हुन्।

दुर्घटनापछि सशस्त्र प्रहरी बल नेपाल विपद् व्यवस्थापन बेस मुलघाट र प्रहरी चौकी मुलघाटबाट उद्धार टोली पुगेको थियो। घाइते दुबै जनालाई बिहान करिब ४:३० बजे एम्बुलेन्समार्फत जिल्ला अस्पताल धनकुटा लगिएको छ। स्थानीयवासीका अनुसार सडक अत्यधिक घुमाउरो र उकालो–ओरालो भएकोले सो ठाउँमा सवारी दुर्घटनाको जोखिम उच्च रहँदै आएको छ।