काठमाडौं । माइतीघर मण्डलामा आन्दोलन गर्न गएका जेनजी अभियन्ता डा. निकोलस भुसाल पक्राउ परेका छन्।
जेनजीको माग सम्बोधन नभएको भन्दै असन्तुष्टि जनाउन भेला भएका भुसालसहित ३ जनालाई प्रहरीले नियन्त्रणमा लिएको जनाएको छ।

माइतीघर परिसरमा प्रहरीको ठूलो परिचालन गरिएको छ र प्रदर्शन गर्न कुनै पनि व्यक्तिलाई अनुमति दिइएको छैन। जेनजी आन्दोलनको एक महिना पूरा भए पनि केही माग सम्बोधन नभएको भन्दै भुसालको समूहले प्रदर्शन आयोजना गरेको थियो।

काठमाडौं जिल्ला प्रशासनले यसअघि नै धर्ना, जुलुस वा प्रदर्शन नगर्न सार्वजनिक सूचना जारी गरेको थियो। सोही निर्णयअनुसार, माइतीघर मण्डला र वरिपरिका क्षेत्रमा कुनै पनि हुल–बाँधर उभिन दिइएको छैन।