काठमाडौं । जेनजी आन्दोलनको सन्दर्भमा नेकपा एमाले अध्यक्ष तथा पूर्वप्रधानमन्त्री केपी शर्मा ओलीविरुद्ध कारबाहीको माग गर्दै माइतीघर मण्डलामा राखिएको ब्यानर केही युवाहरूले हटाएका छन्। ब्यानर हटाउँदै ती युवाहरूले काठमाडौं महानगरपालिकाका मेयर बालेन शाह र ‘हामी नेपाल’ संस्थाका अध्यक्ष सुदन गुरुङविरुद्ध कारबाहीको माग गर्दै नयाँ ब्यानर राखेका छन्।

ब्यानर परिवर्तनसँगै घटनास्थलमा केहीबेर वादविवाद समेत भएको थियो। ब्यानर राख्ने र हटाउने पक्षबीच झडप भने नभएको प्रहरीले जनाएको छ।

गत भदौ २३ गते भएको जेनजी आन्दोलनमा प्रहरी हस्तक्षेपपछि एक किशोरीको मृत्यु भएको घटनालाई लिएर नेकपा एमालेका अध्यक्ष ओली र तत्कालीन गृहमन्त्री रमेश लेखकलाई दोषी ठहर गर्दै मृतकका परिवारले प्रहरीमा जाहेरी दिएका थिए। उक्त जाहेरी प्रहरीले जाँचबुझ आयोगमा पठाएको छ।

यसैबीच, एमाले निकट विद्यार्थी संगठन अनेरास्ववियुले बुधबार काठमाडौं प्रहरी परिसरमा मेयर बालेन शाह र सुदन गुरुङविरुद्ध जाहेरी दर्ता गराएको छ। संगठनले आन्दोलनमा अनावश्यक उत्तेजना फैलाएको र हिंसा बढाएको आरोप उनीहरूमा लगाएको छ।

विवाद भएको स्थान माइतीघर मण्डलामा राजनीतिक तथा नागरिक आन्दोलनका गतिविधि भइरहने भए पनि पछिल्लो समय ब्यानर युद्धको रूपमा प्रदर्शन हुनु भने नागरिक सतर्कताको नयाँ रूपका रूपमा हेरिएको छ।