काठमाडौं। बडादशैं अन्तर्गत नवरात्रको पाँचौँ दिन आज दशैंघर तथा पूजा कोठामा स्कन्दमाताको विधिपूर्वक पूजा आराधना गरिँदैछ।

प्रत्येक वर्ष आश्विन शुक्ल पञ्चमी अर्थात् दुर्गा पक्षको पाँचौँ दिन नवदुर्गामध्येकी पाँचौँ देवी स्कन्दमाताको पूजा गरिन्छ। दशैंका नौ दिनमा नौवटा दुर्गाका रूपको पूजा गरिन्छ। दुर्गा पक्षमा पहिलो दिन शैलपुत्री, दोस्रो दिन ब्रह्मचारिणी, तेस्रो दिन चन्द्रघण्टा, चौथो दिन कुष्माण्डा, पाँचौँ दिन स्कन्दमाता, छैटौँ दिन कात्यायनी, सातौँ दिन कालरात्री, आठौँ दिन महागौरी, र नवौँ दिन सिद्धिदात्रीको पूजा आराधना गरिन्छ।

पौराणिक विवरण अनुसार, स्कन्दको अर्थ सनतकुमार हो। स्कन्दमाताको मूर्तिमा उनी सिंहासनमा बसेकी र दुवै हातले कमलपुष्प समाएको देखिन्छ।