भक्तपुर । नेकपा (एमाले) अध्यक्ष तथा पूर्वप्रधानमन्त्री केपी शर्मा ओलीले दलीय राजनीतिक प्रतिस्पर्धा र लोकतन्त्रप्रति घृणा फैल्याएर दिशाहिन गन्तव्यको राजनीति गर्नेहरुप्रति खबरदारी गर्न सबैमा अपील गर्नुभएको छ । जेनजी पुस्ताको आन्दोलनबाट नजायज फाइदा उठाई दलबिहिन र गन्तव्यहिन बाटोमा मुलुकलाई लान खोजेकोप्रति अध्यक्ष ओलीले आम पार्टी पंक्तिसहित सम्पूर्ण लोकतान्त्रिक शक्तिहरुलाई खबदारी गर्न अपील गर्नुभएको छ ।

प्रेस चौतारी नेपालका प्रतिनिधिहरुसँग भक्तपुर गुन्डु स्थित निवासमा बिहिबार साँझ अध्यक्ष ओलीले भन्नुभयो– ‘प्रतिस्पर्धाको लोकतान्त्रिक राजनीति, मतदानबाट प्रतिनिधि छानिएर आउने व्यवस्थाप्रति घृणा फैल्याउने यो कस्तो गन्तव्य हो ? यस्तो दिशाहिन राजनीति कसैले गर्नु हुँदैन । यसलाई आम पार्टी पंक्ति, लोकतान्त्रिक शक्तिले खबरदारी गर्न मेरो अपील छ ।’
राजनीतिक दलका झण्डा देश बचाउनका लागि उठाइने भएकाले दलबिहिन राजनीति भनेर किन घृणा फैल्याएको छ ? भनि प्रश्न गर्दै ओलीले भन्नुभयो– ‘विवेक शून्य, क्षतिग्रस्त दिमाग, क्षतिग्रस्त लक्ष्यले अराजकताको पैरवी मात्रै गर्दछ ।’ लोकतन्त्र र दलीय व्यवस्थाप्रति घृणा फैल्याइन्छ भने अर्को कुन व्यवस्था र तन्त्र चाहेको हो भनि अध्यक्ष ओलीले प्रश्न गर्नुभयो ।
निर्वाचित निकाय देख्नै नहुने र संरचनामा आगजनी गर्ने काम जेनजी पुस्ताबाट नभएको अध्यक्ष ओलीले बताउनुभयो । ‘जेनजीका माग ठिक थिए । भ्रष्टाचार अन्त्य, सुशासन, पारदर्शीताको मागमा कसैको बिमति होइन’, अध्यक्ष ओलीले भन्नुभयो– ‘तर जेनजी पुस्ताले नेपालको राष्ट्रिय झण्डा ओडेर सिंहदरबारमा आगो लगाउन सक्दैनन् । नेपाली कांग्रेसका सभापति शेरबहादुर जी र आरजुजीलाई त्यस्तो अमानवीय व्यवहार जेनजी पुस्ताले गर्न सक्दै सक्दैन । जेनजी पुस्तालाई देशको माया छ, उ सँग विवेक छ ।’
प्रतिशोधको भावले सामाजिक सदभाव भडकाउने गरी अभिव्यक्ति दिएर सामाजिक मूल्य, मान्यता समाप्त पार्न खोजिएको अध्यक्ष ओलीले बताउनुभयो । सांस्कृतिक धरोहरहरुलाई पूर्णरुपमा ध्वस्त बनाउनु सांस्कृतिक बिचलन आएको उहाँले भन्नुभयो । ‘अहिले देश र समाजलाई पुरै आतंकित पारिएको छ । सर्प, बाघबाट मानिलाई त्रास छैन । सार्वजनिक सम्पत्ति, जनताको धनजनको क्षति पु¥याउने मान्छेबाटै त्रसित बनाइएको छ । जेनजी पुस्ताको आडमा तैंले कुनै दलप्रति, व्यक्तिप्रति समर्थन गरिस भने घर जलाईदिन्छु । कुटपिट गर्छु भनेर समाजमा आतंक सृजना गरिएको छ । यो प्रवृत्तिलाई तत्काल रोक्नु पर्छ । समाज र मान्छेलाई आतंकित बनाउनेहरुलाई कानुनी कार्वाहीको दायरामा लिनुपर्छ’, अध्यक्ष ओलीले भन्नुभयो ।
मुलुकले यति ठूलो क्षति कहिल्यै बेहोर्नु नपरेको औंल्याउँदै अध्यक्ष ओलीले भन्नुभयो– ‘यो क्षतिले समाज र देश विकासमा चौथाई शताब्दी पछाडी ढकेलिदिएको छ । अब खरानीबाट उठ्नु परेको छ । सुधार गर्दै अघि बढ्ने हो । अब आउने पुस्ता सुख, समृद्धिमा बाँच्न पाउनुपर्छ भन्ने हो । तर अहिले जुन ढंगले अघि बढ्न खोजिएको छ । यसबाट समृद्धिको गन्तव्यमा नयाँ पुस्तालाई कहिल्यै पु¥याउँदैन ।’

भूपरिवेष्ठित मुलुकलाई भूजडित बनाउँदा, राष्ट्रिय स्वाधिनता र स्वाभिमानको झण्डा उठाउँदा आफूले अपमान बेहोर्नु परेको अध्यक्ष ओलीले बताउनुभयो । रविन्द्रनाथ टैगोरको ‘एक्ला चलो रे’ कविताको सारासं सुनाउँदै अध्यक्ष ओलीले भन्नुभयो– ‘सत्यमा एक्लै भए पनि उभिनु । सत्य चिर स्थायी हुन्छ ।’ दलहरु मुलुकप्रति जिम्मेवार रहेकाले दलभित्रै व्यवस्थापन र समाधान खोजिने उहाँले बताउनुभयो । केही पार्टी नेताहरुको सार्वजनिक टिप्पणीप्रति लक्षित गर्दै अध्यक्ष ओलीले भन्नुभयो– ‘पार्टीको कुरा फोरममा चलाउने हो । सडक र मौसमी हावाको भरमा चलाउनु हुँदैन । सबैको व्यवस्थापन हुन्छन् ।’ प्रेस तथा वाक स्वतन्त्रता हिजोको दिनमा पनि लडेरै लिएकाले सत्यतामा अडिग रहेको समाचार, विचार संप्रेषण गर्न पत्रकारहरुलाई अध्यक्ष ओलीले आग्रह गर्नुभयो । उहाँले भन्नुभयो– ‘सत्य समाचार, विचार व्यक्त गर्दा, लेख्दा कसैको धम्कीबाट डराउनु पर्दैन । प्रेस तथा वाक स्वतन्त्रता लडेरै लिएको हो । त्यसको उपयोग पत्रकारहरुले निर्भिकताका साथ गर्नुहोस् ।’