चितवन । नारायणगढ–मुग्लिन सडक खण्डको तुइन खोलानजिक सोमबार रातिदेखि सुख्खा पहिरो खसेपछि यातायात प्रभावित भएको छ। लगातार खसिरहेको पहिरो पन्छाउने प्रयास भइरहेको भए पनि पूर्णरूपमा सडक खुल्न सकेको छैन।

भरतपुर सडक डिभिजनका अनुसार तुइन खोलामा खसेको पहिरो पन्छाउन डोजरलगायत उपकरण परिचालन गरिएको छ। तर, सवारी साधनहरू अव्यवस्थित रूपमा सडकमा रोकिएकाले आवश्यक उपकरण र इन्धन ल्याउन कठिनाइ भएको जनाइएको छ।

यसैबीच, मुग्लिन–नागढुंगा सडक खण्ड अन्तर्गत धादिङको जवाङ खोलानजिक पनि सुख्खा पहिरो खसेपछि सडक दुवैतर्फ अवरुद्ध भएको छ। मंगलबार बिहान ठूलो पहिरो खसेपछि अझै पनि ढुंगा–माटो खसिरहेको हुँदा पन्छाउने कार्यमा अवरोध भएको धादिङ प्रहरीले जनाएको छ। प्रहरीले यात्रु र चालकलाई तत्काल वैकल्पिक सडक प्रयोग गर्न आग्रह गरेको छ।