काठमाडौं । जिल्ला प्रहरी परिसर काठमाडौंमा एकैपटक ६ जना वरिष्ठ प्रहरी अधिकृतहरूको सरूवा गरिएको छ । पछिल्ला समय काठमाडौंमा भएका प्रदर्शनहरू र त्यसक्रममा देखिएको प्रहरी प्रशासनको कमजोरीप्रति व्यापक आलोचना भएपछि उच्च तहमा व्यापक रूपले जिम्मेवारी हेरफेर गरिएको हो ।

काठमाडौं प्रहरी प्रमुख एसएसपी विश्व अधिकारीको स्थानमा प्रहरी प्रधान कार्यालय, नक्सालमा सहप्रवक्ताका रूपमा कार्यरत एसएसपी रमेश थापा लाई पठाइएको छ। अधिकारी माघ महिनामा मात्र काठमाडौं आएका थिए ।

प्रहरी स्रोतका अनुसार पछिल्लो भदौ २३ र २४ गते काठमाडौंमा भएको प्रदर्शनको क्रममा देखिएको समन्वयहीनता र ढिलासुस्तीका कारण प्रहरीको आलोचना चुलिएको थियो। यसअघि पनि गत चैत १५ गतेको घटनामा सुरक्षा व्यवस्थापनमा कमजोरी देखिएको भन्दै प्रश्न उठाइएको थियो ।