काठमाडौँ । देशको इतिहासमै पहिलो महिला प्रधानमन्त्रीको रूपमा सुशीला कार्कीको नेतृत्वमा बनेको सरकारसँगै नयाँ ऊर्जा र अपेक्षाहरूको लहर आएको छ। मन्त्रीपरिषद् गठनको तयारी तीव्र भइरहेको बेला संस्कृति, पर्यटन तथा नागरिक उड्डयन मन्त्रालयको नेतृत्वका लागि चार जना व्यक्तित्वको नाम सार्वजनिक चासोको केन्द्र बनेको छ।

नेपाली पर्यटनलाई विश्वसामु उचो बनाउने र नागरिक उड्डयन क्षेत्रमा सुधार ल्याउने महत्वपूर्ण जिम्मेवारी रहने यो मन्त्रालयको लागि राजनीतिक दलहरू गैर-राजनीतिक, अनुभवी र सार्वजनिक जीवनमा विश्वासिलो पात्रहरूको खोजीमा छन् ।

पर्वतारोहणदेखि नीति निर्माणसम्म: फुर गेल्जे शेर्प

पर्यटन क्षेत्रका सशक्त हस्ती फुर गेल्जे शेर्पा सोलुखुम्बुको चौरिखर्कमा जन्मिएका हुन्। नेपाल माउण्टेनियरिङ एसोसिएसन (NMA) को अध्यक्ष, पर्यटन बोर्डका नीति निर्माता, ट्रेकिङ एजेन्सी र नेपाल एयरलाइन्सको बोर्ड सदस्यका रूपमा काम गरिसकेका उनले पर्यटन र हवाई यातायात दुवै क्षेत्रमा अनुभव सँगालेका छन्।

हिमाली क्षेत्रमा होटल, हेलि सेवा र अस्पताल स्थापना गर्दै सामाजिक उत्तरदायित्वमा समेत अग्रणी रहेका शेर्पाले पर्यटनलाई सामुदायिक समृद्धिको माध्यमका रूपमा देख्ने दृष्टिकोण राख्छन्।

आकाशदेखि पर्दासम्म: क्याप्टेन विजय लामा

तीन दशकभन्दा लामो समयदेखि आकाशमा नेपाली झण्डा बोक्दै आएका वरिष्ठ पाइलट विजय लामा पर्यटन मन्त्रालयको अर्को सम्भावित अनुहारका रूपमा देखिएका छन्। पेशागत दक्षता, सुरक्षा चेतना र पारदर्शिता प्रवर्द्धनमा उनले खेलेको भूमिकाले उनलाई नागरिक उड्डयन क्षेत्रको सशक्त प्रतिनिधिका रूपमा स्थापित गरेको छ।

साथै, कलाकारका रूपमा उनले चलचित्र र संगीतमार्फत नेपाललाई विश्वसामु चिनाउने प्रयास गरेका छन्। ‘पहिले देश’ भन्ने भावनाले प्रेरित लामा सांस्कृतिक सम्पदाको संरक्षण र हवाई सुरक्षाको सुधारमा केन्द्रित योजनासहित चर्चामा छन्।

आस्था, संस्कृति र सेवा भावको समिश्रण: पुनम यादव

धार्मिक र सांस्कृतिक कार्यक्रममार्फत समाजमा प्रभाव जमाएकी पुनम यादव पनि मन्त्रालयको नेतृत्वका लागि प्रस्तावित व्यक्तित्वमा परेकी छन्। उनले पुरातात्त्विक सम्पदा संरक्षण, धार्मिक पर्यटनको प्रवर्द्धन र दुर्गम क्षेत्रमा हवाई सेवा विस्तारजस्ता विषयमा काम गर्दै आएकी छन्।

आधुनिक सोच र धार्मिक भावनाको सन्तुलन प्रस्तुत गर्ने यादवले आत्मीय पर्यटनको परिकल्पना अघि सारेकी छन्, जसले विदेशी पर्यटकलाई नेपाली संस्कृतिसँग गहिरो सम्बन्ध गाँस्न प्रेरित गर्छ।

अनुभव र नेतृत्वको पर्याय: विनायक शाह

तीन दशकदेखि पर्यटन उद्योगमा क्रियाशील विनायक शाह, हाल होटल संघ नेपाल (HAN) का अध्यक्ष हुन्। आतिथ्य सेवा, पर्यटन प्रवर्द्धन र संकट व्यवस्थापनमा उनको भूमिका उल्लेखनीय छ। कोभिड महामारीको कठिन समयमा उनले पर्यटन क्षेत्रलाई बचाउन निर्णायक पहल गरेका थिए।

शाह व्यावसायिक पर्यटन नीति, दिगोपन, र समावेशितामा आधारित दृष्टिकोण लिएर चर्चामा छन्। उनका शुभेच्छुकहरू विश्वास गर्छन्— मन्त्रालयलाई एउटा अनुभवी र दूरदर्शी नेतृत्वले मात्र सशक्त बनाउन सक्छ।

को बन्ला पर्यटन मन्त्री ?

प्रधानमन्त्री कार्कीको मन्त्रिपरिषद् विस्तार अन्तिम चरणमा पुगेको छ। संस्कृति, पर्यटन तथा नागरिक उड्डयन मन्त्रालयको नेतृत्वका लागि योग्य, इमानदार र दूरदर्शी अनुहारको खोजी भइरहेका बेला यी चार व्यक्तित्वको नाम अगाडि आएको हो।

सरकारले योग्यताको आधारमा निर्णय लिने संकेत दिएकाले अबको केही दिनभित्रै मन्त्रालयको नयाँ नेतृत्वको टुंगो लाग्ने अपेक्षा गरिएको छ। जसले नेपालको संस्कृति, पहिचान र पर्यटनलाई नयाँ उचाइमा पुर्याउनेछ भन्ने जनअपेक्षा छ।