जनकपुर । जनकपुरधाममा जारी जेनजी आन्दोलनको क्रममा लुटिएको हतियारसहित दुई जनालाई प्रहरीले पक्राउ गरेको छ। मधेश प्रदेश लोक सेवा आयोगको कार्यालयबाट लुटिएको नेपाल प्रहरीको एसएलआर राइफल तथा ५० राउण्ड गोलीसहित उनीहरू पक्राउ परेका हुन्।

धनुषा जिल्ला प्रहरी कार्यालयका अनुसार पक्राउ पर्नेमा जनकपुरधाम उपमहानगरपालिका–९ का ३७ वर्षीय मनिष कुमार अधिकारी र २१ वर्षीय सन्तोष कुमार यादव रहेका छन्। उनीहरूलाई सिसिटिभी फुटेजको आधारमा चिनिएर नियन्त्रणमा लिइएको प्रहरीले जनाएको छ।

घटना जेनजी आन्दोलनको क्रममा भएको थियो। आन्दोलनकारीहरूको समूहले मधेश प्रदेश लोक सेवा आयोगको कार्यालयमा तोडफोड, आगजनी तथा लुटपाट गरेका थिए। त्यस क्रममा सुरक्षाका लागि खटिएको प्रहरीबाट एक थान एसएलआर राइफल लुटिएको थियो।

भाडाको घरमा सञ्चालनमा रहेको आयोगको कार्यालयमा चार वटा चारपाङ्ग्रे गाडी, चार वटा मोटरसाइकल, सिसिटिभी क्यामरा लगायतका संरचनामा तोडफोड र आगजनी गरिएको प्रहरीले जनाएको छ।

प्रहरीका अनुसार घटनामा संलग्न अन्य व्यक्तिहरूको खोजी कार्य पनि जारी छ। जिल्ला प्रहरी कार्यालय धनुषाले घटनालाई गम्भीर सुरक्षा चुनौतीका रूपमा लिएको जनाएको छ।