काठमाडौं । सरकारले जेनजी आन्दोलनको क्रममा देशभर ७२ जनाको मृत्यु भएको पुष्टि गरेको छ । आज प्रधानमन्त्रीले पदभार ग्रहण गर्ने क्रममा प्रधानमन्त्री कार्यालयद्वारा जारी गरिएको विवरणअनुसार आन्दोलनको क्रममा ठूलो मानवीय क्षति भएको छ ।

प्रधानमन्त्री कार्यालयका अनुसार, आन्दोलनको क्रममा ५९ जना आन्दोलनकारी शहीद भएका छन् । यस्तै, ३ जना सुरक्षाकर्मी (प्रहरी) को ज्यान गएको छ । साथै, कारागारबाट भाग्न खोज्ने क्रममा १० जना कैदी मारिएको जानकारी पनि औपचारिक रूपमा दिइएको छ ।

घटनामा १३४ जना प्रदर्शनकारी घाइते भएका छन् र हाल विभिन्न अस्पतालमा उपचाररत छन् । ५७ जना प्रहरी कर्मचारी पनि घाइते भई उपचार लिइरहेका छन् । सरकारले घटनाका सबै विवरण संकलन गरी यथासक्य चाँडो न्यायिक छानबिन थाल्ने जनाएको छ । साथै, शहीदका परिवारलाई राहत, उपचार खर्च तथा आवश्यक सहायताबारे निर्णय गर्न सम्बन्धित निकायलाई निर्देशन दिइएको प्रधानमन्त्री कार्यालयले जनाएको छ ।

जेनजी आन्दोलन केही हप्तादेखि देशभर फैलिरहेको छ, जसको माग, नेतृत्व र दायरा अझै स्पष्ट रूपमा परिभाषित हुन बाँकी छ। यद्यपि, आन्दोलनले राष्ट्रिय राजनीति, सुरक्षास्थिति र नागरिक जीवनमा गम्भीर प्रभाव पारेको छ ।