काठमाडौं । गत मंगलबारदेखि ठप्प रहेको काठमाडौं उपत्यकाको सार्वजनिक सवारी आवागमन शनिबारदेखि पुनः सामान्य बन्दै गएको छ।

शुक्रबार केही गाडी सीमित रूपमा चले पनि शनिबार बिहानैदेखि सार्वजनिक बस, ट्याक्सी लगायतका सवारी साधन बाक्लो संख्यामा सञ्चालनमा आएका छन्। चितवनबाट पनि काठमाडौंका लागि बसहरू छुटेका छन् । जेनजी आन्दोलन अन्तर्गत भएको प्रदर्शनका कारण मंगलबारदेखि उपत्यकाभर सवारी ठप्प भएको थियो। सुरक्षाको कारण सेनाले कर्फ्युसमेत लगाएको थियो। शनिबार बिहान कर्फ्यु हटाइएसँगै जनजीवन सहज बन्दै गएको हो ।

पसलहरू क्रमशः खुल्न थालेका छन् भने प्रदर्शनका क्रममा क्षति पुगेका पसलहरूमा सरसफाइको काम सुरु गरिएको छ। सुरक्षाको लागि तैनाथ गरिएको नेपाली सेना शनिबार बिहानदेखि सडकबाट फिर्ता भइसकेको छ ।