काठमाडौं । नयाँ बानेश्वरस्थित संसद भवन अगाडि युवाहरु बिहानैदेखि भेला हुन थालेका छन्। सोमबार जेनजीले गरेको प्रदर्शनका क्रममा प्रहरीको गोली लागेर १९ जनाको मृत्यु भएपछि युवाहरुले मंगलबार पनि प्रदर्शन गर्ने संकेत देखाएका छन् ।

तर जिल्ला प्रशासन कार्यालय काठमाडौं र ललितपुरले बिहान साढे ४ बजेदेखि अनिश्चितकालीन कर्फ्यू आदेश जारी गरिसकेका छन्। सुरक्षा व्यवस्था कडा पारिएको छ । उता जेनजीले भने आफ्नो आन्दोलन अहिंसात्मक र शान्तिपूर्ण रहने तथा निरन्तरता दिने बताएका छन् । उनीहरु भ्रष्टाचार, कुशासन र रोजगारी अभावको विरोधमा आवाज उठाइरहेका छन् ।

प्रहरी र प्रदर्शनकारीबीचको तनावका कारण सोमबार गोली चल्दा धेरै घाइते भएका छन् भने मृत्युको खबरले युवाहरुमा आक्रोश थपिएको छ । सरकार र प्रशासनलाई आन्दोलनको समाधान शान्तिपूर्ण तरिकाले गर्न दबाव बढेको छ।