काठमाडौं । गृहमन्त्री रमेश लेखकले सोमबार साँझ बालुवाटारमा प्रधानमन्त्री केपी शर्मा ओलीलाई राजीनामा पेश गरेका छन् । प्रधानमन्त्रीको सचिवालयमा आयोजित मन्त्रिपरिषद् बैठक सकिएलगत्तै उनले पदबाट मुक्त हुने घोषणा गरेका हुन् ।

आज राजधानी काठमाडौं र देशका मुख्य सहरहरूमा जेनजी पुस्ताका युवाहरूले सामाजिक सञ्जाल बन्द र भ्रष्टाचारविरूद्ध प्रदर्शन गरेका थिए । ती प्रदर्शनहरू हिंसात्मक बन्दै गएपछि काठमाडौं र इटहरीमा गरी १९ जनाको मृत्यु भएको दुखद समाचार आएको छ । पार्टीका महामन्त्री गगन थापा र विश्वप्रकाश शर्माले गृहमन्त्री लेखकलाई सोमबार साँझ बूढानीलकण्ठमा बसेको पार्टी बैठकमा राजीनामा दिन आग्रह गरेका थिए । सो बैठकमा गृहमन्त्री लेखकले आफूलाई आजको घटनाबाट गहिरो दुःख लागेको र नैतिकताका आधारमा पदबाट राजीनामा दिने निर्णय गरेको जनाएका थिए ।

राजीनामा दिने संकेत दिँदै कांग्रेस बैठकबाट निस्किएका लेखक त्यसपछि बालुवाटार पुगेका थिए । उनका निर्णयलाई प्रधानमन्त्री ओलीले स्वीकार गरेका छन् । देशमा जारी सामाजिक आन्दोलन र पछिल्ला घटनाक्रमले राजनीतिक स्थिरतामा थप प्रभाव पार्ने अपेक्षा गरिएको छ।