काठमाडौं । प्रधानमन्त्री केपी शर्मा ओलीले निजामती सेवा दिवसको अवसरमा शुभकामना सन्देश दिँदै नागरिकलाई झन्झट र दुःख दिने कार्य अब सह्य नहुने स्पष्ट पारेका छन् ।

उनले सामान्य कामका लागि अनावश्यक प्रक्रिया देखाउने र काम पन्छाउने प्रवृत्तिमा तत्काल सुधार आवश्यक रहेको बताए। बदलिँदो प्रविधि र जनअपेक्षा अनुसार निजामती सेवाले आफूलाई रुपान्तरण गर्नुपर्ने उनले औँल्याए ।

प्रधानमन्त्री ओलीले सेवा नागरिकसम्म प्रवाह गर्न अब टेबल–कुर्सीको भरमा मात्र नभई प्रविधिको उपयोग अनिवार्य भएको उल्लेख गरे। उनले ‘सेवा खोज्न नागरिक नआउने, सेवा आफैं नागरिकसम्म पुग्ने’ प्रणाली विकास गर्नुपर्नेमा जोड दिए ।

सन्देशमा निजामती विधेयक संसदमा पारित हुने क्रममा रहेको र यसले संघीय प्रशासनलाई नयाँ उचाइ दिने उल्लेख छ । उनले राष्ट्रसेवक कर्मचारीहरूलाई उच्च मनोबलका साथ उत्तरदायी र पारदर्शी सेवा दिन आह्वान समेत गरेका छन् ।

प्रधानमन्त्रीले ‘समृद्ध नेपाल, सुखी नेपाली’ को राष्ट्रिय लक्ष्य हासिल गर्न निजामती सेवाको भूमिका निर्णायक हुने बताएका छन् ।