काठमाडौं । प्रधानमन्त्रीको हालैको चीन भ्रमणमा लिपुलेकको विषयमा देखाइएको अडानलाई नेकपा एमालेका स्थायी कमिटी सदस्य तथा परराष्ट्रविद् डा. राजन भट्टराईले ऐतिहासिक साहसको कदम भएको बताएका छन्।

प्रेस चौतारी नेपालद्वारा आयोजित साक्षात्कार कार्यक्रममा बोल्दै डा. भट्टराईले भने, “लिपुलेक, कालापानी र लिम्पियाधुरा त्यो भूमि हो, जुन हाम्रा पुर्खाहरूले पानी नखाईकन जोगाएका थिए। अब राष्ट्रघाती मौनता सह्य हुँदैन।” डा. भट्टराईले भारत–चीनबीच हालै भएको दस बुँदे सहमतिप्रति गम्भीर आपत्ति जनाउँदै सहमतिका आठौं बुँदा लिपुलेकसँग प्रत्यक्ष सम्बन्धित रहेको उल्लेख गरे। उनले भने,

“नेपालको सहमति विना लिपुलेक क्षेत्रलाई व्यापारिक मार्ग बनाउने निर्णय अन्तर्राष्ट्रिय नियमविपरीतको स्पष्ट हस्तक्षेप हो। भारतको अतिक्रमण त स्पष्ट छ, तर चीनको चुप्पी अब आपत्तिजनक बनेको छ।” उनले नेपालले पटक–पटक आफ्ना सीमासम्बन्धी दाबी इतिहास, दस्तावेज र तथ्यका आधारमा उठाउँदै आएको स्मरण गराउँदै थपे, “यो भूभाग कुनै राजनीतिक नाफा–नोक्साको हिसाबकिताब गर्ने विषय होइन, यो नेपालको पहिचान, स्वाभिमान र अस्तित्वको विषय हो।” डा. भट्टराईले भने, “नेपालको भूमि र राष्ट्रिय स्वाभिमानको सवालमा अब कुनै पनि प्रकारको सम्झौता स्वीकार्य छैन।”