काठमाडौं । प्रधानमन्त्री केपी शर्मा ओली र भियतनामका प्रधानमन्त्री फाम मिन चिङबीच चीनको थियानजिनमा द्विपक्षीय भेटवार्ता सम्पन्न भएको छ ।

प्रधानमन्त्री ओली शाङ्घाई सहयोग संगठन (SCO) को शिखर सम्मेलनमा सहभागी हुन शनिबारदेखि चीन भ्रमणमा रहेका छन् । प्रधानमन्त्रीको सचिवालयका अनुसार, सोमबार सम्पन्न भेटवार्तामा दुई पक्षीय हित, आपसी सहकार्य र क्षेत्रीय साझेदारीका विविध विषयमा छलफल भएको हो। भेटमा द्विपक्षीय व्यापार, पूर्वाधार विकास, पर्यटन प्रवर्द्धन, शिक्षा तथा सांस्कृतिक आदान- प्रदानलगायतका सम्भावित क्षेत्रहरूमा सहकार्य विस्तार गर्ने विषयमा पनि कुराकानी भएको जनाइएको छ । यसअघि प्रधानमन्त्री ओलीले चिनियाँ राष्ट्रपति सी जिनपिङसँग समेत भेटवार्ता गरेका थिए। दुई नेताबीच आपसी हित, नेपालको भौतिक पूर्वाधार विकास, व्यापार विस्तार र कनेक्टिभिटी सुदृढीकरणलगायत विषयमा छलफल भएको थियो।

प्रधानमन्त्री ओलीको यो भ्रमण नेपालका लागि कूटनीतिक दृष्टिकोणले महत्वपूर्ण मानिएको छ । शाङ्घाई सहयोग संगठनजस्तो बहुपक्षीय मंचमा सहभागितासँगै द्विपक्षीय सम्बन्ध सुदृढ पार्ने अवसरसमेत नेपालले पाएको छ ।

प्रधानमन्त्री ओलीको भ्रमणलाई लिएर नेपाली कूटनीतिक वृत्तले सकारात्मक संकेत लिएको छ। क्षेत्रीय तथा अन्तर्राष्ट्रिय सम्बन्ध सुदृढ पार्ने उद्देश्यसहित गरिएको उच्चस्तरीय भेटवार्ताले नेपालका बहुपक्षीय सम्बन्धलाई नयाँ उचाइमा पुर्‍याउने विश्वास गरिएको छ।