काठमाडौं । नेपाल सरकारका उपप्रधानमन्त्री तथा अर्थमन्त्री विष्णुप्रसाद पौडेलले मुलुकमा निजी क्षेत्रको आत्मविश्वास बढाउँदै दीर्घकालीन र स्थायी लगानीको वातावरण तयार गर्न सरकार प्रतिवद्ध रहेको बताएका छन् ।

शनिबार काठमाडौँमा आयोजित ट्रेकिङ एजेन्सी एसोसिएसन अफ नेपाल (टान) को ४७ औँ वार्षिक साधारणसभाको उद्घाटन समारोहमा बोल्दै अर्थमन्त्री पौडेलले सरकार हाल लगानीमैत्री नीतिहरू निर्माण गर्नतर्फ अग्रसर रहेको स्पष्ट पारे। उनले राजनीतिक स्थायित्व, नीतिगत स्पष्टता र कार्यान्वयनमा दृढता ल्याएर लगानीकर्ताहरूलाई नेपालप्रति विश्वस्त बनाउन सरकार लागिपरेको बताए । अर्थमन्त्री पौडेलले आफूले अर्थ मन्त्रालयको नेतृत्व सम्हाल्दा मुलुकको आर्थिक अवस्था निकै जटिल रहेको उल्लेख गर्दै अहिले भने अर्थतन्त्रका प्रमुख सूचकहरू क्रमशः सुधारको चरणमा रहेको बताए । उनले भने, “हिजो हामीले सरकार सम्हाल्दा सम्पूर्ण आर्थिक सूचकहरू नकारात्मक थिए। तर आज ती सूचकहरू सकारात्मक दिशातर्फ उन्मुख छन्। यो सरकारको नीतिगत प्रयास र निजी क्षेत्रको सहकार्यकै परिणाम हो ।”

कार्यक्रमका दौरान उनले हाल सरकारले मूल्य अभिवृद्धि कर (भ्याट) मा छुट दिन नसक्ने स्पष्ट पारे। राजस्व संकलनले सरकारका दैनिक सञ्चालन खर्च धान्नै गाह्रो भएको अवस्थामा कर छुट दिनु व्यवहारिक नहुने उनको भनाइ थियो । “भ्याट छुटभन्दा पनि व्यवसाय प्रवद्र्धनका कार्यक्रम ल्याउनुहोस्। सरकार सहजीकरण गर्न तयार छ। हामी व्यवसायीका योजनालाई मूर्तरूप दिन सहकार्य गर्नेछौं,” उनले भने ।

अर्थमन्त्री पौडेलले वर्तमान सरकार स्थिर, बलियो र दीर्घकालीन कार्यकालका लागि तयार रहेको उल्लेख गर्दै यही सरकार २०८४ सालको निर्वाचनसम्म अगाडि बढ्ने स्पष्ट पारे। यसबाट नीति, कार्यक्रम र बजेटको कार्यान्वयनमा स्थायित्व आउने र लगानीकर्ताहरूमा विश्वास बढ्ने विश्वास व्यक्त गरे। “राजनीतिक स्थायित्वको सुनिश्चितता भइसकेको छ। नीति, कार्यक्रम र बजेटको प्रभावकारी कार्यान्वयनमा हामी विशेष ध्यान दिइरहेका छौँ,” उनले थपे। उक्त कार्यक्रममा ट्रेकिङ एजेन्सी एसोसिएसन अफ नेपाल (टान) का अध्यक्ष सागर पाण्डेले पर्यटन क्षेत्रको विकासका लागि सरकारसँग स्पष्ट नीतिगत सुधार र पूर्वाधार विकासमा प्राथमिकता दिन आग्रह गरे।

उनले भने, “सरकारले पर्यटन व्यवसायीहरूलाई सहज वातावरण निर्माण गर्न पूर्वाधार तथा नीतिगत संरचनामा सुधार गर्न आवश्यक छ। पर्यटन क्षेत्र राष्ट्रको अर्थतन्त्रको मेरुदण्ड हो।” पाण्डेले पर्वतीय पर्यटन, पदमार्ग विकास, पर्यटक सुरक्षाजस्ता विषयमा सरकारको ध्यान आकर्षण गराए।

सो अवसरमा पर्वतीय पर्यटन प्रवर्द्धनमा योगदान पुर्‍याउने विभिन्न संघ–संस्था र सञ्चारकर्मीहरूलाई सम्मान तथा पुरस्कार प्रदान गरिएको थियो। टानले हरेक वर्ष जस्तै यसपालि पनि पर्यटन क्षेत्रका अगुवाहरूको योगदानलाई कदर गर्दै सम्मानित गरेको हो।