काठमाडौं । प्रधानमन्त्री केपी शर्मा ओलीले भोलिदेखि सुरु हुने आफ्नो पाँचदिने चीन भ्रमणबारे प्रतिनिधिसभालाई जानकारी गराएका छन्। शुक्रबार संसदमा सम्बोधन गर्दै उनले भ्रमणको उद्देश्य शाङ्घाई सहयोग संगठन (एससीओ) को शिखर सम्मेलनमा सहभागिता र द्विपक्षीय भेटघाट रहेको बताए।

प्रधानमन्त्री ओली भदौ १४ देखि १८ गतेसम्म चीनको थियानजिन र बेइजिङ भ्रमणमा रहनेछन्। भ्रमणका क्रममा चिनियाँ राष्ट्रपति सी चिनफिङ, उपराष्ट्रपति हान चङ्ग, साथै रूस, माल्दिभ्स, भियतनाम, कम्बोडियालगायत देशका नेतासँग भेटवार्ता हुने कार्यक्रम छ।

भ्रमण टोलीमा श्रीमती राधिका शाक्य, मन्त्रीहरू रघुजी पन्त, बद्रीप्रसाद पाण्डे, कांग्रेस नेता पूर्णबहादुर खड्का लगायत सहभागी छन्। ओलीले भ्रमणले नेपाल–चीन सम्बन्ध सुदृढ गर्नुका साथै अन्तर्राष्ट्रिय मञ्चमा नेपालको उपस्थिति बलियो बनाउने विश्वास व्यक्त गरे।