काठमाडौं । चीनका राष्ट्रपति सी चिनफिङले भारतसँग सम्बन्ध सुधारको पहल गर्दै भारतीय राष्ट्रपति द्रौपदी मुर्मुलाई गोप्य पत्र पठाएका छन्। अमेरिकी राष्ट्रपति डोनाल्ड ट्रम्पले चीनविरुद्ध कडा व्यापार नीति अपनाइरहेका बेला सीले भारतसँग रणनीतिक समझदारी खोजेको ब्लुमबर्गले उल्लेख गरेको छ।

पत्रमा अमेरिका-भारतको सम्भावित गठबन्धन चीनको हितविरुद्ध हुन सक्ने चिन्ता व्यक्त गरिएको थियो। यद्यपि राष्ट्रपति मुर्मुको कार्यकारी भूमिका नभए पनि सम्बन्ध सुधारको सन्देश प्रधानमन्त्री मोदीसम्म पुर्‍याइएको थियो।

यसपछि चीनले भारतसँगको सम्बन्धलाई ‘ड्र्यागन-हात्ती नृत्य’को उपमा दिँदै सहकार्यको संकेत दिएको छ। गलवान झडपपछि चिसिएको सम्बन्ध अहिले पुनः सुधारोन्मुख छ। मोदी आगामी एससीओ सम्मेलनका लागि चीन जान लागेका छन्, जहाँ दुई देशबीच थप सहयोगका निर्णय हुने अपेक्षा गरिएको छ।