तेमाल। काभ्रेको तेमाल गाउँपालिका-८, थामडाँडामा महिला सशक्तीकरण कार्यक्रम अन्तर्गत गठन गरिएको पहिलो महिला समूह “कोम्हेंदो कृषक महिला समूह” लाई हिउँदे तरकारी बालीको बीउ वितरण गरिएको छ ।

हिमालयन लिकी फाउन्डेसनको आर्थिक तथा प्राविधिक सहयोगमा सञ्चालित महिला सशक्तीकरण कार्यक्रममार्फत सो समूहका महिलाहरूलाई बीउ वितरण गरिएको हो। कार्यक्रममा समूह सदस्य महिलाहरूलाई आत्मनिर्भर बनाउने उद्देश्यले आर्थिक उपार्जनमा जोड दिइएको छ । फाउन्डेसनले हालसम्म २४ वटा महिला समूह गठन गरी करिब ५३० जना महिलालाई सशक्तीकरण कार्यक्रममा सहभागी गराएको छ। कार्यक्रम अन्तर्गत विशेषगरी बर्षे र हिउँदे बाली उत्पादनका लागि बीउ वितरण गरिएको छ। साथै, क्षमता अभिवृद्धि तालिम, संस्थागत विकास तालिम लगायतका विभिन्न सीपमूलक कार्यक्रमहरू पनि सञ्चालन भइरहेका छन् ।

स्थानीयस्तरमै आर्थिक आत्मनिर्भरता र महिला सशक्तीकरणलाई बलियो बनाउने उद्देश्यले कार्यक्रम अगाडि बढाइएको आयोजक पक्षले जनाएको छ। महिला सदस्यहरूले कृषि उत्पादनमा आधारित कार्यक्रमबाट आफूहरूमा आत्मविश्वास र आर्थिक क्रियाशीलता बढेको अनुभव सुनाएका छन् ।