सिन्धुली । नेकपा एमाले सम्बद्ध अखिल नेपाल महिला संघ सिन्धुलीले आज बुधवार सिन्धुलीमा भव्य तीज कार्यक्रमको आयोजना गरेको छ । अनेमसंघ सिन्धुलीकी अध्यक्ष शान्ता पाख्रिनको अध्यक्षता एवम् अनेमसंघकी केन्द्रीय कोषाध्यक्ष इन्दिरा फुयाँलको प्रमुख आतिथ्यतामा भएको कार्यक्रम अहिलेसम्मकै सबैभन्दा बढी महिला उपस्थित भएको कार्यक्रमको रुपमा लिइएको छ ।
अनेमसंघले आयोजना गरेको तीज कार्यक्रममा यतिधेरै महिलाहरु उपस्थित भएको पहिलो कार्यक्रम बनेको देखिएको हो । कार्यक्रमलाई प्रमुख अतिथिका रुपमा सम्बोधनगर्दै नेता फुयाँलले महिला मुक्ति आन्दोलनसँग तीज पर्वलाई जोडेर लैजानुपर्ने बताउँदै अधिकारसँग कर्तव्य बोध पनि जरुरी रहेको उल्लेख गरिन् ।

कार्यक्रमलाई नेकपा एमालेकी केन्द्रीय सदस्य उमा कोइराला, निरु दर्लामी, बरिष्ठ नेता खड्ग खत्री, जिल्ला अध्यक्ष महेन्द्रदेव श्रेष्ठ र उपाध्यक्ष एवम् प्रचार तथा प्रकाशन विभाग प्रमुख कर्ण घिसिङ लगायतले सम्वोधन गरेका थिए ।

कार्यक्रमको समापनगर्दै अनेमसंघकी जिल्ला अध्यक्ष शान्ता पाख्रिनले कार्यक्रममा सहभागी भएका सम्पूर्ण दिदी बहिनीहरुलाई धन्यवाद ज्ञापनगर्दै महिला अधिकारको रक्षाका लागि सबै गोलबन्द हुन आग्रह गरेकी थिइन् ।
कमलामाई पार्टी प्यालेसको सभाहलमा खचाखच भरिएका महिलाहरुले महिला मुक्ति आन्दोलनसँग सम्बन्धित गीतहरुमा नृत्य प्रस्तुत गरेका थिए । अनमेसंघकी जिल्ला सचिव शारदा ढकालले सञ्चालन गरेको कार्यक्रममा विभिन्न पालिका कमिटीबाट महिलाहरु सहभागी भएको महिला नेतृ रेजिना श्रेष्ठले जानकारी दिइन् ।

जिल्ला अधिवेशनका बेला अहिलेको नेतृत्वले केही गर्न सक्दैन भन्नेहरुलाई आजको कार्यक्रमले जवाफ दिएको देखिएको छ । आजको उपस्थितिले भने आयोजक महिला नेतृहरु उत्साहित बनेका छन् ।