काठमाडौं । सर्वोच्च अदालतले किशोरी र महिलाबाट डिम्ब निष्कासन र भण्डारण नगर्न आदेश दिएको छ। अधिवक्ता अंकिता त्रिपाठीलगायतले दायर गरेको रिटमा सुनुवाइ गर्दै न्यायाधीश टेकप्रसाद ढुङ्गानाको एकल इजलासले सरकारलाई यस्तो आदेश दिएको हो।

बबरमहलस्थित होप फर्टिलिटी एन्ड डायग्नोसिस प्रालिले अवैध रूपमा डिम्ब निकालेर बिक्री गरेको विषय सार्वजनिक भएपछि रिट दायर गरिएको थियो। अदालतले डिम्ब निष्कासनको काम तत्काल रोक्न, नियमन तथा निगरानी प्रभावकारी बनाउन सरकारलाई निर्देशन दिएको छ।

रिटमा १८ वर्षमुनिका किशोरीबाट डिम्ब निष्कासनमा पूर्ण प्रतिबन्ध लगाउन र प्रजनन शोषणलाई मानव बेचबिखनको रूपमा कानुनी मान्यता दिन माग गरिएको छ।