काठमाडौं । राष्ट्रपति रामचन्द्र पौडेलसँग नेपाल भ्रमणमा रहेका भारतीय विदेश सचिव विक्रम मिश्रीले आइतबार राष्ट्रपति भवन शीतल निवासमा शिष्टाचार भेट गरेका छन् ।

भेटका क्रममा राष्ट्रपति पौडेलले भारतले सामाजिक, आर्थिक तथा प्राविधिक क्षेत्रमा देखाएको प्रगतिबाट नेपालले लाभ पाएको र अझ बढी लाभान्वित हुन चाहेको बताएका छन् । उनले दुई देशबीचको सम्बन्धलाई उच्च प्राथमिकतामा राख्ने नेपाल सरकारको प्रतिबद्धता व्यक्त गर्दै भारतको ‘छिमेक पहिलो नीति’लाई पनि स्वागत गरेका छन् ।

भारतीय विदेश सचिव मिश्रीले पनि प्रधानमन्त्री नरेन्द्र मोदीको छिमेकी नीतिअनुसार नेपाललाई विशेष प्राथमिकतामा राखिएको र दुवै देशबीच कनेक्टिभिटी र सहयोग बढाउन आफ्नो भ्रमणले सहयोग पुग्ने विश्वास व्यक्त गरेका छन् । यस भेटघाटले नेपाल–भारतबीचको पारंपरिक मैत्रीपूर्ण सम्बन्ध अझ प्रगाढ बनाउन मद्दत पुग्ने विश्वास व्यक्त गरिएको छ ।