सुनसरी । लगातारको अविरल वर्षाले सप्तकोशी नदीमा पानीको बहाव उच्च स्तरमा पुगेको छ। शनिबार राति ९ बजे गरिएको मापन अनुसार कोशी ब्यारेजमा पानीको बहाव प्रतिसेकेण्ड २ लाख ४३० क्यूसेक पुगेको सशस्त्र प्रहरी बल नेपाल नम्बर ४ हेडक्वार्टरका सशस्त्र प्रहरी उपरीक्षक निर्मलकुमार थापाले जानकारी दिए।

कोशी ब्यारेजका ५६ ढोकामध्ये हाल २८ ढोका खोलिएका छन्। पानीको बहाव प्रतिसेकेण्ड १ लाख ५० हजार क्यूसेक नाघेपछि खतरा सूचकका रूपमा रातो बत्ती बाल्ने गरिएको छ, जसअनुसार ब्यारेजको कन्ट्रोल रुमबाट रातो बत्ती प्रज्वलन गरिएको छ।

थापाका अनुसार हालसम्म कोशी नदीको पूर्वी तटबन्धमा कुनै क्षति नभएको छ। तर, वर्षा जारी रहेकाले जलसतह अझ बढ्ने सम्भावना रहेको र सर्तकता आवश्यक रहेको उनले बताए।

केही दिनदेखिको लगातार वर्षाका कारण नदीमा पानीको सतह उच्च भएको हो। प्रशासनले नदी आसपासका बासिन्दालाई सतर्क रहन आग्रह गर्दै सम्भावित बाढी र डुबानको जोखिम न्यूनीकरणका लागि तयारी अवस्थामा रहन स्थानीय निकायहरूलाई निर्देशन दिएको छ।