हेटौंडा । राष्ट्रिय प्रजातान्त्रिक यातायात मजदुर संघ, जिल्ला कार्यसमिति मकवानपुरले स्वास्थ्य बीमा सेवामा देखिएको गम्भीर अव्यवस्थाप्रति गम्भीर ध्यानाकर्षण गराउँदै नेपाल सरकारअन्तर्गतको स्वास्थ्य बीमा बोर्डलाई सात बुँदे ज्ञापनपत्र बुझाएको छ ।

संघका अध्यक्ष काजीमान तितुङको नेतृत्वमा बुझाइएको सो ज्ञापनपत्रमा स्वास्थ्य बीमा सेवामा व्याप्त समस्या समाधानका लागि तत्काल आवश्यक कदम चाल्न माग गरिएको छ । स्वास्थ्य बीमा ऐन, २०७४ को दफा ९(६) र नियमावली, २०७५ अनुसार बीमित सेवाग्राहीले पाउने सेवा हाल अव्यवस्थित भएकाले विशेषगरी मकवानपुर जिल्लाका नागरिकहरू समस्यामा परेको संघको आरोप छ ।

अध्यक्ष तितुङले स्वयं हेटौंडा अस्पतालमा उपचारको क्रममा लापरवाही, रिफर प्रक्रियाको जटिलता र समय व्यवस्थापनको अभावले आफैं पीडित बन्नुपरेको अनुभव सुनाएका छन् । संघले हेटौंडा अस्पताल र सामुदायिक हेटौंडा आँखा अस्पतालबीच समन्वयको अभावले आँखाजस्तो संवेदनशील उपचारमा समेत आम नागरिकलाई सास्ती भइरहेको भन्दै तत्काल समस्या समाधान गर्न चेतावनी दिएको छ । संघले समस्या समाधान नभए चरणबद्ध संघर्षका कार्यक्रम घोषणा गर्ने र पत्रकार सम्मेलनमार्फत आन्दोलनको घोषणा गर्ने चेतावनीसमेत दिएको छ ।

ज्ञापनपत्रमा उल्लेख गरिएका सात प्रमुख मागहरू यसप्रकार छन् :

१ .हेटौंडा अस्पतालमा आँखाको सेवा विस्तार गरी नियमित सञ्चालन गर्नुपर्ने ।

२. सामुदायिक हेटौंडा आँखा अस्पताललाई स्वास्थ्य बीमाको पहिलो सेवाविन्दुका रूपमा कायम गर्नुपर्ने ।

३.हेटौंडा अस्पताल र सामुदायिक आँखा अस्पतालबीचको विवाद तत्काल अन्त्य गर्नुपर्ने ।

४.सामुदायिक आँखा अस्पतालमा स्वास्थ्य बीमा सेवा पूर्ण रूपमा लागू गर्नुपर्ने ।

५.निजी अस्पतालहरूमा समेत रिफर खारेजको व्यवस्था लागू गर्नुपर्ने ।

६. रिफरको समय र टोकन वितरण प्रक्रिया व्यावहारिक र प्रभावकारी बनाउनुपर्ने ।

७. हालको तीन महिनाको सेवा अवधि परिमार्जन गर्नुपर्ने ।

संघले नागरिकको मौलिक स्वास्थ्य अधिकार सुनिश्चित गर्न स्वास्थ्य बीमा प्रणालीलाई प्रभावकारी, पारदर्शी र सेवा–केन्द्रित बनाउन जोड दिएको छ ।