सप्तरी । सप्तरी जिल्लाको राजगड गाउँपालिका–२ मा गए राति प्रहरीद्वारा चलाइएको गोली लागेर एक जनाको मृत्यु भएको छ। मधेस प्रदेश प्रहरीका अनुसार मृतक लालु यादव हुन्, जो सोही ठाउँका बासिन्दा हुन् ।

प्रहरीले मदिरा तस्करी रोक्न सर्च अपरेसन चलाएको क्रममा तस्कर समूहसँग झडप भएको र आत्मरक्षाका लागि गोली चलाउनु परेको प्रहरीको दाबी छ। घटनाबारे जानकारी दिँदै मधेस प्रदेश प्रहरी प्रमुख उमाप्रसाद चतुर्वेदीले भने, “सीमावर्ती क्षेत्रमा मदिरा भण्डारण गरी तस्करी भइरहेको गुप्त सूचना पाइएको थियो। सोही आधारमा राति सर्च अपरेसन गर्दा झडप भयो ।”

झडपका क्रममा तस्कर समूहले प्रहरीमाथि घेरा हालेर ढुङ्गामुढा प्रहार गरेपछि प्रहरीले सात राउन्ड गोली चलाएको चतुर्वेदीको भनाइ छ। सोही क्रममा गोली लालु यादवको तिघ्रामा लागेपछि गम्भीर घाइते भएका उनलाई उपचारका लागि लैजाने क्रममा बाटोमै मृत्यु भएको बताइएको छ ।

प्रहरीका अनुसार घटनास्थलबाट ८० कार्टुन विभिन्न ब्रान्डका रक्सी बरामद गरिएको छ। नेपाल–भारत सीमा नजिकैको उक्त क्षेत्र मदिरा तस्करीका लागि संवेदनशील मानिन्छ ।