काठमाडौं । तुर्कमेनिस्तानको तटवर्ती सहर अवाजा मा भइरहेको भूपरिवेष्टित विकासशील राष्ट्रहरूको तेस्रो संयुक्त राष्ट्रसंघीय सम्मेलनमा सहभागी हुन पुगेका प्रधानमन्त्री केपी शर्मा ओली आज विभिन्न उच्चस्तरीय छलफल र द्विपक्षीय भेटवार्तामा सहभागी हुँदैछन् ।

प्रधानमन्त्री ओलीले आज सम्मेलन अन्तर्गत आयोजना हुने ‘जलवायु परिवर्तनका कारण सिर्जित प्रकोपमा भूपरिवेष्ठित विकासशील देशहरूले अवलम्बन गर्नुपर्ने अनुकूलन क्षमता र लचिलोपन’ विषयक सत्रमा सम्बोधन गर्ने कार्यक्रम रहेको छ। सो सत्रमा उनले जलवायु परिवर्तनका कारण उत्पन्न संकटहरूलाई सामना गर्न नेपालसहित भूपरिवेष्टित देशहरूले अपनाउनुपर्ने उपायहरूबारे धारणा व्यक्त गर्ने अपेक्षा गरिएको छ ।

त्यसैगरी, प्रधानमन्त्री ओलीले ‘भूपरिवेष्ठित विकासशील देशहरूको लागि व्यापार तथा वाणिज्यको सहजता र क्षेत्रीय सहकार्य’ विषयमा हुने छलफल सत्रको सहअध्यक्षता पनि गर्नेछन्। उनले व्यापार पारवहन, पूर्वाधार विकास र क्षेत्रीय एकीकरणका विषयमा नेपालको अनुभव र सम्भावनाहरू प्रस्तुत गर्ने तयारी गरेका छन् ।