काठमाडौं । नेकपा एमाले को दोस्रो विधान महाधिवेशनको तयारी सन्दर्भमा जनसङ्गठन समन्वय संयन्त्रको बैठक आज प्रधानमन्त्री निवास बालुवाटारमा सम्पन्न भएको छ ।

आगामी भदौ २० देखि २२ गतेसम्म ललितपुरको गोदावरीमा आयोजना हुने महाधिवेशनलाई सफल बनाउने लक्ष्यसहित आयोजना गरिएको बैठकमा आवश्यक तयारी, समन्वय र कार्ययोजनाका विषयमा छलफल गरिएको हो । बैठकमा सम्माननीय प्रधानमन्त्री एवम् नेकपा (एमाले) का अध्यक्ष केपी शर्मा ओली प्रमुख अतिथिको रुपमा सहभागी हुनु भएको थियो । बैठकलाई सम्बोधन गर्दै अध्यक्ष ओलीले पार्टी सचिवालय, पोलिटब्यूरो र केन्द्रीय समितिको बैठकमा भएका निर्णयहरुलाई सशक्त ढंगले कार्यकर्तामाझ संप्रेषण गर्न निर्देशन दिनु भयो ।

उहाँले पार्टी जीवन, कार्यनीति, रणनीति र अनुशासनका विषयमा स्पष्ट धारणा राख्दै आगामी विधान महाधिवेशनलाई संगठनात्मक एकता, विचार सुदृढीकरण र समग्र राष्ट्रिय हितको मार्गचित्र तय गर्ने ऐतिहासिक अवसरको रुपमा लिनुपर्नेमा जोड दिनु भयो । अध्यक्ष ओलीले जनसङ्गठनहरुसँग अनुशासन, समर्पण र उत्तरदायित्वबोधसहित सशक्त भूमिका निर्वाह गर्न विशेष आग्रह गर्नु भयो ।

बैठकको सञ्चालन स्थायी समिति सदस्य तथा जनसङ्गठन समन्वय संयन्त्रका भानुभक ढकालले गर्नुभएको थियो । बैठकमा २३ वटा जनसङ्गठनका इञ्चार्ज, अध्यक्ष र महासचिवहरुको उपस्थिति थियो । बैठकमा विधान महाधिवेशनको तयारी, सांगठनिक सुदृढीकरण, जनसङ्गठनहरुको भूमिका, समन्वय र सक्रियतालाई अझ प्रभावकारी बनाउने विषयमा विस्तृत छलफल भएको थियो।