काठमाडौँ । नेकपा (एमाले) रसुवा जिल्ला अध्यक्ष जनार्दन ढकालले पुनः एमालेमै फर्किने घोषणा गरेका छन् । केही समयअघि अध्यक्षसहित सबै जिम्मेवारीबाट अलग भएको घोषणा गरेका ढकालले पार्टीमै पुनः सक्रिय हुने तयारी गरेका हुन् ।

टेलिभिजन अन्तरवार्तामा ढकालले आफूविरुद्ध चौतर्फी घेराबन्दी भएकाले पार्टी परित्याग गर्नु परेको उल्लेख गरेका थिए । उनले पार्टी बैठकहरूमा सचिवस्तरीय नेताबाट चार पटकसम्म सांघातिक आक्रमण भएको गुनासो समेत गरेका थिए । पुनः फर्किनुअघि रसुवाका एमाले नेताहरु मकवानपुरको चित्लाङ अर्गानिक भिलेज रिसोर्टमा छलफलमा सहभागी भएका छन् ।

रसुवाका एमाले पदाधिकारीहरूका अनुसार ढकालले पुनः अध्यक्षकै हैसियतमा फर्किने तयारी गरेका छन् । पार्टीभित्रको असन्तोष समाधान गर्दै एकताको सन्देश दिन जनार्दन ढकाल पुनः एमाले नेतृत्वमा फर्कन लागेका हुन् ।