झापा, बुधबारे । प्रधानमन्त्री केपी शर्मा ओलीले झापाको बुद्धशान्ति गाउँपालिका–३, बुधबारेमा निर्माण सम्पन्न भागीरथा न्यौपाने बुद्धशान्ति अस्पतालको शुक्रबार एक विशेष समारोहबीच उद्घाटन गर्नुभएको छ। नेपालकै पहिलो तत्कालीन प्रधानपञ्च भागीरथा न्यौपानेको नाममा स्थापित यो आधारभूत अस्पताल १० शैय्याको छ, जसले दैनिक करिब ४ सय बिरामीलाई सेवा दिन सक्ने क्षमता राखेको जनाइएको छ।

उद्घाटन समारोहलाई सम्बोधन गर्दै प्रधानमन्त्री ओलीले पुरानो पुस्ताका आदर्श पात्र भागीरथा न्यौपानेको स्मरण गर्दै समाजसेवाको भावना झल्किने उल्लेख गर्नुभयो । “भागीरथाजस्ता महान् आत्माले दान र त्यागको माध्यमबाट समाजलाई समर्पण गर्नुभएको छ,” प्रधानमन्त्री ओलीले भन्नुभयो, “मर्दा कोही केही लिएर जान सक्दैन, त्यसैले जिउँदो छँदा समाजको लागि योगदान दिनु नै साँचो जीवन हो ।” प्रधानमन्त्री ओलीले अस्पताल स्थापनाका लागि जग्गा दान गर्ने न्यौपाने परिवारप्रति आभार व्यक्त गर्दै सो अस्पतालको स्तरोन्नति तथा सेवा विस्तारका लागि संघीय सरकारले पूर्ण सहयोग गर्ने प्रतिबद्धता व्यक्त गर्नुभयो ।

कार्यक्रममा प्रदेश सरकार, स्थानीय जनप्रतिनिधि, स्वास्थ्यकर्मी, बुद्धशान्तिका बासिन्दा तथा न्यौपाने परिवारका सदस्यहरूको उल्लेखनीय उपस्थिति रहेको थियो । प्रधानमन्त्री ओली आज झापामा रहेका विभिन्न कार्यक्रमहरूमा सहभागी भई भोलि इलामतर्फ प्रस्थान गर्नुहुने कार्यक्रम रहेको प्रधानमन्त्रीको सचिवालयले जनाएको छ ।