सिन्धुलीः मानवअधिकार तथा सामाजिक न्याय मञ्च (मानवअधिकार एलायन्स) सिन्धुलीको छैठौं जिल्ला अधिवेशनले अधिकारकर्मी दुर्गाराज पौडेललाई पुनः अध्यक्षमा निर्वार्चित गरेको छ ।
मानवअधिकारको क्षेत्रमा क्रियाशिल संस्था मानवअधिकार एलायन्सको आज सिन्धुलीमाढीमा आयोजित छैठौं जिल्ला अधिवेशनले उपाध्यक्षमा केआर विजय, सचिवमा उज्वल न्यौपाने, कोषाध्यक्षमा सरस्वती बुढाथोकी र सदस्यहरुले धनकुमारी तामाङ, मिना आचार्य, सुरवहादुर बम्जन, सरिता राई र सावित्रा रिजाल चयन हुनुभएको निर्वाचन मण्डलका सदस्य कृष्णहरु घिमिरेले जानकारी दिनुभयो । कार्यक्रममा नेकपा एमाले बागमती प्रदेश कमिटी सचिवालय सदस्य शान्तिमान कार्कीले मानवअधिकार एलायन्सले सशस्त्र द्धन्द्धका समयमा खेलेको भूमिकाको प्रशंसागर्दै मानवअधिकार पनि वर्गीय हुनुपर्ने बताउनुभयो ।
कार्यक्रममा एमाले बागमती प्रदेश कमिटी सदस्य एवम् संस्कृति विभाग प्रमुख रस्मिला देवकोटाले मानवअधिकार रक्षा सबैको सरोकारको विषय भएको बताउनुभयो ।
नेकपा एमाले सिन्धुलीका सचिव नवराज थिङले नेकपा एमालेले मात्रै मानवअधिकारका सम्पूर्ण प्रावधानलाई पूर्ण रुपमा अंगीकार गरेको बताउँदै मानवअधिकार रक्षाका लागि एलायन्सका निर्वाचित पदाधिकारीले आफ्‌नो दक्षतालाई व्यवहारमा प्रयोग गर्न सुझाब दिनुभयो ।
कार्यक्रममा वोल्दै मानवअधिकार एलायन्स इन्चार्ज कृष्णहरी घिमिरेले हिंसात्मक द्धन्द्धका समयमा भएको गंभीर मानवअधिकार उलंघनका घटनाहरुमा संलग्नहरुलाई दण्डित गर्नुको साटो उन्मुक्ति दिने षडयन्त्र भएको बताउँदै वेपत्ता, अंगभंग र हत्या गरिएका नागरिकहरुको पिडालाई भुल्न नहुने बताउनुभयो । कार्यक्रममा नेकपा एमालेकी उपसचिव पार्वती भट्टराईले समेत सम्वोधन गर्नुभएको थियो भने सञ्चालन प्रमोद तिमल्सिनाले गर्नु भएको हो ।