काठमाडौं । भक्तपुरमा टिपरको ठक्करबाट काभ्रेपलाञ्चोकको मण्डनदेउपुर नगरपालिका–१ का एक युवकको मृत्यु भएको छ । सो दुर्घटनामा अर्का एक जना घाइते भएका छन् ।

दुर्घटनामा परी काभ्रेको मण्डनदेउपुर नगरपालिका–१ घर भई हाल भक्तपुरको कमलविनायक बस्ने २१ वर्षीय सुवास तामाङको मृत्यु भएको हो । भक्तपुरको मध्यपुर ठिमी नगरपालिका–४ नयाँठिमी स्थित सडक खण्डमा काठमाडौंबाट भक्तपुरतर्फ जाँदै गरेको गण्डकी प्रदेश ७ प ५३५३ नम्बरको मोटरसाइकललाई बागमती प्रदेश ४ ख २९०१ नम्बरको टिपरले पछाडिबाट ठक्कर दिँदा तामाङ गम्भीर घाइते भएका थिए ।

गम्भीर घाइते भएका उनलाई मध्यपुर अस्पताल ठिमी लगिएकोमा उपचारको क्रममा आइतबार बिहान मृत्यु भएको हो । टिपरको ठक्करबाट मोटरसाइकलमा पछाडि सवार काभ्रेकै २० वर्षीय सञ्जिव थापामगर घाइते भएका छन् । उनको सोही अस्पतालमा उपचार भइरहेको प्रहरीले जनाएको छ ।

टिपर चालक काभ्रेको मण्डनदेउपुर नगरपालिका–६ का २८ वर्षीय राजकुमार राईलाई प्रहरीले नियन्त्रणमा लिइएको छ ।