काठमाण्डौ । राष्ट्र सङ्घीय शैक्षिक, वैज्ञानिक र सांस्कृतिक सङ्गठन (युनेस्को) ले काठमाण्डौलाई ‘फिल्मको रचनात्मक शहर’ को रूपमा सूचीकृत गरेको छ ।

आज काठमाण्डौमा पत्रकार सम्मेलन गर्दै काठमाण्डौ महानगरले यसबारेमा जानकारी गराएको हो । महानगरले अब चलचित्र क्षेत्रको विकास र विस्तारका लागि काठमाण्डौ क्रिएट द काउन्सिल (केसीएसी) स्थापना गर्ने पनि पत्रकार सम्मेलनमार्फत जनाएको छ । चलचित्र क्षेत्रको विकास र विस्तार तथा चलचित्रसँग सम्बन्धित उद्योग सञ्चालन, संरक्षण र प्रवर्द्धनका लागि आवश्यक पर्ने नीति अनुसन्धान र विकासमा जोड दिने बताइएको छ । यसले सांस्कृतिक र रचनात्मक कलाअन्तर्गतका सबै कार्यक्रम, गतिविधि कार्यान्वयन गर्ने महानगरको विश्वास छ ।

विश्व शहर दिवसको अवसरमा काठमाण्डौसहितका संसारका ५५ वटा शहरलाई क्रिएटिभ सिटिज नेटवर्कु मा समावेश गरिएको युनेस्कोले जनाएको छ । युनेस्कोले सात वटा रचनात्मक क्षेत्रअन्तर्गत रहेर ५५ वटा नयाँ शहर सूचीकृत गरेको हो । यी रचनात्मक क्षेत्रमा शिल्प र लोककला, डिजाइन, फिल्म, ग्यास्ट्रोनोमी, साहित्य, मिडिया कला र सङ्गीत समावेश छन् ।

चलचित्र उद्योगमा आबद्ध क्षेत्रगत जनशक्तिको शैक्षिक क्षमता सुधार, प्रशिक्षण, चलचित्र विषय अध्ययन हुने विद्यालय तथा विश्वविद्यालयबीच समन्वयरसहकार्य गरेर स्थानीय राष्ट्रिय तथा अन्तर्राष्ट्रिय चलचित्र निर्माण गर्न प्रतिभाहरूलाई प्रोत्साहन गर्ने महानगरको नीति रहेको छ । चलचित्र उद्योगको विकासका लागि आवश्यक नीति तर्जुमा वकालत गर्ने, शहरका लागि सांस्कृतिक र रचनात्मक रणनीति विकास गर्ने, अनुसन्धानकर्ताहरूका लागि बर्सेनि अनुसन्धान फेलोशिप प्रदान गर्ने, सीमान्तकृत र कमजोर समुदायसहित लक्षित वर्गलाई यसमा सहमति प्रदान गरिने महानगरले बताएको छ । चलचित्र र अन्य रचनात्मक उद्योगहरूका लागि विद्यमान पूर्वाधारलाई सुधार स्तरोन्नति गरिने जनाइएको छ ।

महानगरले अन्तर्राष्ट्रियस्तरका उद्यमीलाई सञ्जालमा जोड्न अन्तर्राष्ट्रिय चित्र महोत्सव, फिल्म एक्स्पो फिल्म समिट जस्ता कार्यक्रम सञ्चालन गर्ने भएको छ । युनेस्को क्रियटिभ सिटिज नेटवर्क (यूसीसीएन) कार्यक्रम सञ्चालनका लागि महानगरपालिकाले पाँच करोड रुपैयाँ विनियोजन गरेको छ ।