बिराटनगर । कांग्रेस–एमालेबीच सत्ता सहकार्य कोशी प्रदेशबाट सुरु भएको छ । नवनियुक्त मुख्यमन्त्री केदार कार्कीले तीन सदस्यीय मन्त्रिपरिषद् गठनसंगै सत्ता सहकार्य सुरु भएको हो ।

मुख्यमन्त्री कार्कीले आफ्नो शपथ ग्रहणअगावै दुई मन्त्री नियुक्त गरी तीन सदस्यीय मन्त्रिपरिषद गठन गर्नुभएको हो । उहाँहरुले केहीबेरमा पद तथा गोपनियताको शपथ लिन लाग्नुभएको छ ।

शनिबार कांग्रेसका प्रदेश सांसद कार्कीलाई मुख्यमन्त्री नियुक्त भएका कार्कीको सिफारिसमा प्रदेश प्रमुख पर्शुराम खापुङले दुई जनालाई मन्त्री नियुक्त गर्नुभएको छ । कांग्रेसका विद्रोही सांसदमध्ये शम्शेर राई र एमालेबाट संसदीय दलका उपनेता रामबहादुर मगर मन्त्री नियुक्त गरिएको हो ।

राई र मगर दुवैजना एउटै जिल्ला इलामबाट निर्वाचित प्रदेश सांसद हुनुहुन्छ ।

कांग्रेसबाट विद्रोह गरेर एमालेको समर्थनमा कार्की प्रदेशको आठौं मुख्यमन्त्री नियुक्त हुनुभएको हो । कांग्रेसबाट विद्रोह गरेका ८ र एमलेका ३९ सहित ४७ प्रदेश सांसदको सनाखत गराएर प्रदेश प्रमुख खापुङले कार्कीलाई शनिबार मुख्यमन्त्री नियुक्त गर्नुभएको थियो ।