काठमाडौँ । नेकपा एमाले सुदूरपश्चिम प्रदेश अधिवेशन आजपनि जारी रहेको छ । हिजो साँझ निर्वाचन समितिले सार्वजनिक गरेको निर्वाचन तालिका अनुसार आज साँझ ५ बजेदेखि मतदान हुन लागेको हो । आज बिहान ७ देखि साढे ९ बजेसम्म उम्मेदवारी दर्ता गर्ने समय तोकिएको छ । उम्मेदवारको प्रारम्भिक नामावली बिहान साढे ११ बजे प्रकाशन गर्ने र त्यही समयभित्र उम्मेदवारको विरोधमा उजुरी दिन सकिनेछ ।

निर्वाचन तालिका अनुसार साढे १२ देखि २ बजेसम्म उम्मेदवारी फिर्ता गर्न सकिने निर्वाचन समितिले जनाएको छ । साढे २ बजे उम्मेदवारको अन्तिम नामावली प्रकाशन हुनेछ। एमाले सुदूरपश्चिम निर्वाचन समितिले बेलुकी ५ बजेदेखि मतदान सुरु गर्ने बताएको छ ।

प्रदेश अध्यक्षमा अछामका कृष्णप्रसाद जैसी र कमल तिमिल्सिना तथा कञ्चनपुरका वचनबहादुर सिंहको दाबी छ। एमाले अध्यक्ष केपी शर्मा ओलीले आइतबार प्रदेश अधिवेशनको उद्घाटन गर्नुभएको थियो। अधिवेशनमा ६ सय ५७ जना प्रतिनिधि रहेका छन् । अधिवेशनले ५ पदाधिकारीसहित १ सय ५५ सदस्यीय कमिटी निर्वाचित गर्ने छ।