काठमाडौं । नेकपा एमालेका महासचिव शंकर पोखरेलले देशलाई बोक्ने जिम्मेवारी एमालेको काँधमा आएको वताउनु भएको छ ।
आजबाट सुरु भएको नेकपा एमाले गण्डकी प्रदेशको प्रथम अधिवेशन उदघाटन समारोहलाई सम्बोधन गर्दै महासचिव पोखरेलले यस्तो बताउनु भएको हो । उहाँले देशलाई शान्ति प्रक्रियामा ल्याउन, संविधान जारी गर्न र त्यसलाई कार्यान्वयनको लागि एमालेले नेतृत्व गरिरहेको बताउनुभयो ।

सिङ्गो नेपाली समाजलाई एकताको सूत्रमा बाँध्ने कामको अगुवाइ नेकपा एमालेले गरेको उहाँले भनाई छ । उहाँले अहिले राष्ट्रलाई जोड्ने अभियानमा एमालेले अगुवाइ गरेको स्मरण पनि गराउनुभयो । यतिेबला एमाले र एमालेको नेतृत्व माथि चौतर्फी घेराबन्दीको प्रयास भएको भन्दै त्यसलाई चिरेर अघि बढने उहाँले बताउनुभयो । यस्तो बेलामा पनि देशलाई बोक्ने जिम्मेवारी एमालेको काँधमा रहेको पोखरेलले प्रष्ट पार्नुभयो ।

अहिले देश चरम आर्थिक संकटमा फसेको भन्दै महासचिव पोखरेलले सरकारको कडा आलोचना गर्नुभयो । देशलाई गम्भीर आर्थिक संकटमा लैजाने काम वर्तमान गठबन्धन सरकारले गरिरहेको उहाँले दाबी गर्नुभयो । वर्तमान सरकारले दलाल नोकरसाहको हितमा काम गरिहरेको उहाँले बताउनुभयो । ‘यो सरकार जनताको सरकार होइन, दलाल नोकर साहहरूको सरकार हो’, महासचिव पोखरेलले भन्नुभयो ।

सुशासनको कुरा गर्ने सरकारले भ्रष्टाचारको घटना छानबिन गर्न समेत प्रतिपक्षले दबाब दिनु परेको उहाँले स्मरण पनि गराउनुभयो । जति बेला तस्करीको सुन पक्राउ पर्छ त्यति बेला गठबन्धनका नेताहरूको चरित्र उदाङ्गो हुने गरेको उहाँले उदाहरण दिनुभयो ।

संविधान कार्यान्वयनको सन्दर्भमा प्रदेश र स्थानीय तहसम्म अधिकार पु¥याउने कुरामा सबैभन्दा बढी काम नेकपा एमालेले गरेको उहाँले बताउनुभयो । देशमा एमालेले विकास निर्माणको अभियान नै चलाएकोमा अहिले त्यसलाई रोक्ने काम भइरहेको भन्दै उहाँले गठबन्धन सरकारको आलोचना गर्नुभयो । ‘गठबन्धन सरकार बने पछि सबै क्षेत्र अस्तव्यस्त बनेको छ’, महासचिव पोखरेलले भन्नुभयो ।

गठबन्धन सरकारले देश बर्बाद गर्ने काम मात्र गरेको तथ्य पनि उहाँले औल्याउनु भएको छ । अहिलेका प्रधानमन्त्री जनतालाई जस्तोसुकै समस्या परे पनि मस्तराममा रहेका उहाँको भनाइ छ । देश गम्भीर समस्यामा परेको बेला पनि प्रधानमन्त्री १५ दिनसम्म विदेश भ्रमणमा हिँड्नु भएको भन्दै उहाँले आलोचना गर्नुभयो । ‘गठबन्धनको नेतृत्व जति बेलासम्म सरकारमा रहन्छ, जनताको भाग्य र भविष्य बरबाद हुँदै छ, त्यस अर्थमा यो सरकारलाई छिटो भन्दा छिटो बिदा दिनुपर्छ’ उहाँले भन्नुभयो ।

अहिले देशको आर्थिक संकटको प्रमुख कारण गठबन्धन सरकारको भ्रष्टता नै भएको उहाँले बताउनु भयो । त्यसको अन्त्यको लागि आउने चुनावबाट नेकपा एमाले बहुमत सहित सरकारमा जान पर्नेमा महासचिव पोखरेलको निश्कर्ष छ ।