काठमाडौं । वन तथा वातावरण मन्त्री विरेन्द्र प्रसाद महतोले सरकारले सुशासन कायम गर्न कसैसँग पनि सम्झौता नगर्ने जिकिर गरेका छन् ।
शनिबार आयोजित राष्ट्रिय फोटो पत्रकार समुह, नेपालको २६ औं वार्षिक साधारणसभा तथा सम्मान कार्यक्रमलाई सम्बोधन गर्दै उनले सरकारले सुशासन कायम गर्न कसैसँग पनि सम्झौता नगर्ने बताए ।
उनले भने, ‘सुशासन कायम गर्न सरकारले कसैसँग पनि सम्झौता गर्दैन यो सरकारको पहिलो सर्त हो । हामी विकास र समृद्धिको मामलामा सबैसँग हातेमालो गरेर अगाडि बढेका छौं ।’
मन्त्री महतोले वनलाई व्यवस्थित गदै देशमा भएको श्रोत ,साधन र जैविक विविधतालाई राष्ट्रको समृद्धिमा जोड्न आवश्यक रहेको बताए ।
उनले भने,‘वनलाई व्यवस्थित गदै हामीसँग भएको श्रोत र साधन र हामीसँग भएको खनिजहरु र जैविक विविधतालाई राष्ट्रको समृद्धिमा जोड्न सकेनौं भने त्यसको अर्थ हुँदैन ।’
उनले फोटोबाट नै देशलाई चिनाउन सफल भएता पनि बढ्दो सामाजिक सञ्जालको प्रयोगले फोटो पत्रकारितामा विकृति पनि फैलिएको टिप्पणी गरे ।